Kase Barmain Minyak…

Om susupo makin heran baliat ini kalakuannya oknum patugas yang dibilang-bilang ada tasangkot deng minyak tanah, tapi sampe skarang macam pe susah skali mo kase tuntas depe kasus. Bayangkan, hele polisi saja macam kalangkabut, padahal yang dorang ada cari-cari itu patugas juga. Kalu so patugas yang kalangkabut mo diurus, baru bagimana mo ba urus rakyat. Mustinya, so ini patugas yang jadi contoh baikot aturan deng butul-butul. Tapi kalu so patugas, apalagi yang ada jabatan penting, yang stengah mati diurus, baru bagimana kasian deng ini rakyat. Jang sampe, kalu rakyat yang ada tasangkot hokum, macam pe gampang skali didusu-dusu, kon pe gampang skali di kase maso di dalam sel.
Om susupo mo bakase semangat sama ini bapak-bapak polisi, coba kasian kase tunjuk itu keseriusan bakase tuntas ini kasus minyak tanah yang mo dibawa ka kampong laen, kon tabungkus pake gabus ikan. Karna kalu so lama skali, biasa hele depe kasus so melek, jadi so te menarik, kon akhirnya dibuang bagitu saja. Padahal mustinya depe pelaku di kase maso sel, kalu parlu diborgol turus, supaya dorang tau depe siksa barmain minyak.
Cuma om susupo juga ragu sandiri, kira-kira ini patugas polisi memang serius atau tidak. Kan ini polisi so dikase ilmu luar biasa buat ba cari ini orang yang ada tasangkot deng kasus. So skarang ini depe waktu buat bakase liat kahebatannya polisi yang dorang dapat waktu pendidikan. Jang sampe, itu ilmu kepolisian, akhirnya manguap bagitu saja, kan rugi skolah jadi patugas hokum, tapi hele mo bakase tuntas kasus kacili bagitu, macam pe suak skali. Blum lagi, baru-baru ini om susupo ada dengar-dengar kabar soal penimbunan BBM yang ada tatangkap, tapi sampe skarang juga so te jelas depe kabar lagi.
Cuma kalu yang terakhir ini, om susupo juga heran, karna te ada depe barita di koran, padahal ada banyak orang yang babacarita soal itu kasus. Om susupo pusing juga, jang-jang memang itu temuan te ada, atau barangkali so baku ikot manguap. Maklum, depe nama saja minyak, kalu so tejemur matahari, biasa so manguap palan-palan, kon akhirnya abis.
Yah, biar bagitu, om susupo masih mo ba usaha parcaya sama ini patugas hukum. Om susupo yakin, polisi tatap mo selidiki itu kasus, karna te enak juga kalu kasus minyak yang ada bikin tasangkot pajabat diusut sampe abis, kon kasus lain yang depe jumlah temuan lebeh banyak, baru ilang bagitu saja.
Mustinya, samua yang ada bakase barmain minyak, kase maso saja disel, supaya dorang tau, kalu mo barmain minyak te boleh sambarangan. Karna kalu sambarangan barmain minyak, bisa bikin tabakar-bakar. Om susupo cuma baharap skali, mudah-mudahan ini kasus minyak te berakhir deng ator damai, kon te ada yang tamaso di sel. Kalu memang itu kasus te butul, polisi juga parlu kase penjelasan terbuka, supaya samua orang tau, kalu itu kajadian hari Senin, cuma pura-pura saja atau cuma latihan…Yah, penjelasan terbuka kan parlu, supaya om susupo juga te penasaran, kon bapikir yang aneh-aneh…**