Ebee, Gaji Basaar Tapi Malas…

Om susupo heran baliat ini model karja di Indonesia, ada yang dapat penghasilan sadikit skali dalam satu bulan, kon biasa te cukup dipake buat samua kabutuhan untuk satu bulan, tapi dorang pe rajin luar biasa. Yah, macam ini orang yang bakarja sambarangan alias te tatap depe karja. Kandati depe penghasilan pe sadikit skali, tapi tiap hari dorang so musti bangun pagi kon mancari…Barangkali memang, karna depe pendapatan kacili, jadi memang musti rajin, supaya bisa bertahan hidup. Ini tabubale kalu dibanding deng ada barapa anggota dewan macam yang bakantor di pinggi Teluk Lalong, yang so badapat gaji lumayan basaar, karna so babunyi jut-jut, tapi masih juga pamalas karja. Jang bilang karja jadi wakilnya rakyat kon babatariak akan kapantingannya rakyat di rapat-rapat, hele depe batang idong saja, rupa so susah kaliatan di dewan. Bayangkan, ada wakil rakyat yang so barapa bulan sejak abis perubahan pimpinan alat kelengkapan dewan, te pernah kaliatan di dewan. Skarang ini saja, mustinya ada yang baku ikot rapat pansus, tapi bagimana mo rapat, kalu kaliatan saja pe susah skali. Kalu mo ba alasan puasa, ternyata ada juga anggota dewan yang te puasa, tapi pamalas datang.

Om susupo juga te tau, dorang ini masih ada ba ingat rakyat atau so lupa. Atau jang-jang hele depe alamat kantor, dorang so lupa juga ?...

Cuma om susupo masih yakin, kalu barapa basaar dorang pe gaji, pasti dorang te lupa sampe skarang ini. Alamat kantor barangkali ada yang lupa, tapi soal gaji, te mungkin dorang lupa…

Om susupo pikir, kalu mo baharap ini Badan Kehormatan buat ba awasi, rupa parcuma juga. Maklum, hele katua BK saja te tiap hari bakantor, kon kalu ba kantor juga, rupa capaat pulang. Barangkali, tinggal depe partai sandiri yang bisa baliat –liat, masih parlu dipertahankan buat bawakili partai, atau so boleh di kore-kore. Karna kalu soal bawakili rakyat, om susupo so pesimis. Karna itu tadi, hele hadir saja pe pamalas, baru bagimana dorang mo baku pikir deng rakyat pe urusan.

Tagal itu, barangkali memang tinggal katua partai yang barani, yang bisa baliat ini modelnya anggota dewan yang tinggal depe papan nama di ruang rapat yang gagah, tapi depe orang so te tau kamana…Cuma kalu mo dikase biar juga, apa boleh buat. Kan paling yang rugi rakyat deng doi rakyat, yang musti babayar turuus haknya anggota dewan, kandati dorang pamalas ka kantor…Memang kalu soal hak, so pasti dorang kajaar skali, tapi kalu so soal kawajiban, ebee kasian…**