Jang Kapling Samua…

Om susupo bingung juga baliat ini pamarentah yang macam salalu talambat ba urus masalah yang ada muncul-muncul. Macam soal ini kasus batimbun laut yang so pe banyak kajadian, rupa dikase-kase biarnya pamarentah. Te tau juga, ini pamarentah te tau depe aturan atau bagimana, kon sampe dikase-kase biar ini orang babatimbun laut sambarangan. Dari yang om susupo liat-liat, dari Maahas sampe somo amper Koyoan sana, rupa so pe banyak skali ini yang babatimbun, tapi macam yang te ada depe masalah. Padahal, sarta om susupo babaliat di internet (sory, biar cuma skolah apa adanya, om susupo juga so bisa ba internet), ternyata te sambarangan ini batimbun laut. Kandati depe alasan karma tanah yang ilang abis dibagenya ombak, tatap te bisa sambarang ba bawa tanah kon batimbun ulang. Karna itu tanah yang so ilang karna alam, so jadi negara punya.
Cuma om susupo pikir, biarjo soal depe aturan itu, nanti saja diurus. Yang om susupo anggap bahaya kalu dikase biar, lama-lama ini pante so te ada, karna orang so kapling-kapling samua, buat dorang pe kapantingan sandiri. Yah, lama-lama ini nelayan so mo jadi kalangkabut, karna hele mo bacari tampat buat basandar akan depe parahu, so susah skali. Bayangkan, kalu pante so dikapling buat kapantingannya pengusaha, baru ini nelayan yang pulang dari bapancing kon cuma badapat kadompe atau suntung babarapa ekor, tantu so repot mo bacari tampat balabuh. Te mungkin juga mo sandar di tempat pelelangan ikan, kalu yang didapat cuma satu loyang kacili, kon cuma abis buat dimakan sandiri.
Baru bukan cuma itu. Om susupo yang biasa mandi laut, juga somo jadi pusing. Kalu so te ada depe pante. Bagimana lagi mo mandi-mandi laut, kalu ini pante somulai dikapling-kapling, kan lama-lama abis samua ini pante. Apalagi dengar-dengar, ini pamarentah somo babikin jalan di pinggir pante sampe di kilo lima. Baru kalu yang suka mo mandi laut, tantu terpaksa musti balompat dari jalan ka laut, karna so te ada depe paser putih.
Yah, kalu dorang yang te hobi mandi laut, mungkin karna takut mo jadi itam, atau memang karna te tau baranang, atau karna depe hobi cuma main golf , memang te paduli deng itu pante mo abis atau tidak. Kalu yang model bagini memang te baku pusing deng soal pante, mo dikaplingnya sapa saja, pasti dorang tutup mata deng tutup talinga. Apalagi kalu so campur badapat sesuatu, tatambah dorang tutup mata deng talinga, kandati balanggar aturan.
Cuma, karna om susupo memang hobi mandi laut, kon suka skali baliat itu pante yang gagah, so pasti te ikhlas kalu ini pante somo dikase abis buat sagala rupa kapantingannya pengusaha. Kalu memang ada tanah dipinggir pante, yah cukup sampe dipinggir pante itu depe kekuasaan. Jang lagi babatambah deng batimbun laut. Tagal itu, om susupo minta ini pamarentah liat akan kasian ini keselamatannya pante, jang abis buat orang tertentu saja…Simpan akan sebagian ini pante buat om susupo deng yang laen, kan te mungkin cuma mo mandi laut, baru om susupo musti tarbang ka Jakarta kon pigi ka Ancol sana…**