So Kaya Skali…

Kalu biasanya ini pamarentah salalu ba alasan te cukup doi buat mo ikot akan rakyat pe kabutuhan, kon akhirnya apa yang rakyat mau, biasanya cuma jadi harapan turuus. Yah, macam waktu ada pertemuan atau musrenbang sampe proposal yang rakyat ada bikin, banyak yang dijawab, insya Allah mo dipenuhinya pamarentah kalu anggaran so cukup, atau insya Allah nanti taon depan. Bagitu turuus itu jawaban, kalu blum dibikin akan…Rakyat akhirnya cuma bisa pasrah. Kandati parlu jalan usaha tani, rakyat tinggal baharap, mudah-mudahan pamarentah te lupa. Kandari parlu bantuan usaha ekonomi produktif, rakyat cuma baharap mudah-mudahan itu proposal yang dorang bikin te disimpan di dekat tampat sampah. Kandati parlu air bersih deng capaat, rakyat cuma mampu baharap, mudah-mudahan ada yang depe pikiran masih bersih skali kon mampu babilang akan rakyat pe kabutuhan.
Tapi yang om susupo rasa heran, pe banyak skali alasan soal doi yang te cukup, tapi ini pamarentah biasa juga sambarangan babikin sesuatu. Macam itu babikin kantor dewan yang sebenarnya te parlu, eh dibikin gagah-gagah, kon akhirnya te dipake sampe skarang ini. Depe jadi, itu bangunan so rusak-rusak, so punuh deng coretan, kon barangkali so jadi rumahnya setan. Liat juga itu kantor camat Luwuk yang pe jaoh skali di gunung sana. Di bikin-bikin, baru sarta so jadi, dianggap jaoh, kon akhirnya dikase turun ulang ka tengah itu kantor camat. Yah, skarang barangkali juga setan so ba kos akan itu bangunan…
Kalu baliat yang bagini, om susupo jadi te parcaya kalu ini pamarentah te cukup doi buat mo babikin sagala rupa. Kan depe bukti, biar blum parlu skali, main bikin saja itu bangunan, te tau mo dipake atau tidak, pokoknya bikin saja. Ini yang kaliatan skarang ini. Itu bangunan yang buat kantor dewan, memang te jelas skali. Kan kantor dewan yang skarang, pe gagah skali, kon ada ditengah kota. Jadi kalu om susupo mo suka adukan masalah di kampung, gampang skali, karna memang ada di tengah kota. Tapi yang depe aneh, kinapa juga kon ada yang ba ide babikin kantor baru di tengah pohon-pohon kalapa, baru ada di gunung sana. Kalu blum parlu skali, mustinya kan te usah dulu dibikin. Tagal itu, om susupo te yakin kalu ini doi te cukup buat babangun daerah. Ini daerah pasti kaya, kon depe doi pasti ta lebeh-lebeh, sebab hele rumah buat tampat tinggalnya setan dibikin akan deng anggaran sampe milyaran rupiah.
Sudah kalu cuma bangunan kayu macam bangunan dulu-dulu, kalu dianggap jaoh skali, tinggal pangge orang satu kampung kon angkat rame-rame, bawa ka tampat baru yang lebeh disuka. Tapi ini kan bangunan beton, hele jin ifrit pasti te mangaku mo disuru ba angkat itu bangunan ka tengah kota.
Skarang, karna so jadi, te ada guna mo dimanyasal akan. Pokoknya musti dipake, kandati bukan buat anggota dewan. Yah, karna ada di dekat hutan, kalu bisa kase jadi saja buat kantornya orang-orang yang ba urus hutan. Karna skarang ini, kantornya kehutanan ada di tengah kota, kon ada baku dekat deng pertokoan. Ini kan garaap depe nama. Tagal itu, om susupo ba ide, itu kantor yang te dipake, kon depe tampat jaoh dari tengah kota, kase buat kehutanan. Tapi kalu tatap te mo dipake, kase hibah saja itu bangunan, terserah buat sapa, kalu parlu kase buat mahluk halus saja…**