Jang cuma kase hebat Bandara

Om susupo trus trang sanang deng ini Luwuk yang so jadi kota yang maju kon rame skali. Apalagi depe Bandara atau lapangan terbang, so tiap hari ada pesawat yang basinggah akan, kon depe pesawat so basar-basaar baru depe penerbangan so sampe di Jakarta. Orang di Jawa yang mo ka Luwuk, so te susah, karna so ada pesawat langsung, bagitu juga yang dari Luwuk kon mo ka kota-kota laen, so gampang skali, karna ini pesawat-pesawat dari Luwuk langsung ka Makassar.
Kalu di kase banding deng kota laen yang depe status masih ibukota kabupaten di Sulawesi, barangkali Luwuk so jadi salah satu yang rame depe lapangan terbang, kon balayani pesawat basaar.
Cuma yang bikin om susupo sedih baliat, kalu ini lapangan terbang Bubung so pe rame deng pesawat basaar, kon amper tiap-tiap taon dipermak, depe kondisi tabubale deng ini jalan darat. Padahal, ini jalan darat lebeh banyak yang pake orang kacili yang depe kondisi ekonomi masih kasian, baru kendaraan yang dorang pake, angkutan umum yang kebanyakan so mulai rusak-rusak baku ikot deng jalan yang rusak.
Om susupo sandiri rupa so bosan badengar ini keluhannya orang, soal jalan darat di Kabupaten Banggai yang tabulengkar, bikin sakit badan, kon bikin kendaraan capat skali rusak.
Kalu bajalan darat dari Luwuk mo tujuan ka Bunta, mo Balantak atau mo Toili, pokoknya musti siap-siap deng suak kon sakit-sakit badan. Kalu pake kendaraan yang peku-peku, juga musti siap-siap badengar itu bunyinya kendaraan yang rupa ada batare nafas panjang, karna hele oto deng motor rupa suka mo manangis baliat ini jalan di Kabupaten Banggai. Cuma kalu yang nae oto gagah kon depe silinder basaar, tantu te talalo barasa kalu dibanding deng yang nae oto angkutan umum. Apalagi kalu yang nae oto yang dibili pake doi rakyat, om susupo pikir tantu te parlu baku pusing deng soal karusakannya itu oto, toh kalu rusak, ada doi rakyat buat depe pemeliharaan. Cuma so itu, bagimana deng ini rakyat. Kon yang lebeh bikin pusing om susupo, kalu rakyat bapaksa mo kase bae jalan, salalu yang muncul alasan soal status jalan yang provinsi punya. Baru sampe kapan ini rakyat mo tunggu perhatiannya provinsi, sampe kapan rakyat musti suak kon sakit-sakit badan nae oto angkutan umum atau nae motor.
Om susupo pikir, coba jang cuma itu bandara yang mo dikase hebat kon dibangga-bangga akan. Om susupo lebeh bangga, kalu ini jalan darat yang dikase mulus samua, karna om susupo sandiri masih lebeh banyak nae motor daripada nae pesawat…**