Kasus So Te Ada…

Waktu badengar ada penggerebekan tukang timbun minyak, om susupo pertama-pertama langsung sanang skali, karna ternyata ini aparat masih mau paduli deng ini penegakan hukum kon batindak ini pengusaha yang bikin kalangkabut rakyat karna minyak capat ilang dari pasaran. Cuma rasa salutnya om susupo itu jadi tagantong, karna sampe skarang ini, blum ada depe kabar yang jelas soal itu penggerebekan. Apalagi kamarin, om susupo ada babaca informasi di koran, kalu ini bosnya patugas baru mo baselidiki itu kasus. Kon yang bikin om susupo tatambah heran, eh te ada koran yang baberitakan itu kasus waktu pertama abis digerebek, padahal ada taman yang bacarita, waktu penggerebekan ada wartawan yang baliput. Yah, om susupo jadi penasaran juga, kanapa kon sampe depe barita te ada ee ?...
Tapi om susupo bapikir, barangkali memang itu kajadian cuma pura-pura, alias hanya latihan. Kan memang banyak ilmunya panjahat terutama panjahat BBM yang so canggih, kon dorang ini memang licin parsis minyak. Jadi barangkali, supaya ini ilmu tatambah, ada yang balatihan cara bagerebek. Tapi om susupo tatap panasaran juga, kalu cuma latihan, kanapa juga kon musti dilorong-lorong. Kan biasa kalu latihan, hele dihalaman kantor bisa dibikin, supaya gampang diulang-ulang, kalu masih ada yang blum jago.
Baru yang lebeh bikin heran, kalu memang cuma latihan, kinapa juga kon te ada depe barita. Padahal biasa, hele latihan voly saja dibaritakan…
Yah, om susupo cuma bisa basusupo akan ini kajadian.
Cuma kalu memang itu kajadian penggerebekan butul-butul ada kon asli, bukan latihan, mustinya ada depe informasi yang jelas, karna ini kasus BBM memang menarik. Liat saja itu kasus BBM minyak tanah yang ada dibawanya patugas lain ka Pagimana, padahal depe jumlah pe sadikit skali, tapi tatap menarik, karna memang ini BBM salalu bikin pusing banyak orang. Liat saja waktu ada kabar BBM mo nae harga tempo hari, ini yang bademo pe banyak skali, kon yang ba antri jug ape banyak skali, baru yang jadi panjual dadakan juga pe banyak, kon biar ini BBM pe banyak skali, tatap juga banyak orang yang te kabagian BBM, kandati so baku antri panjang.
Tagal itu, om susupo pikir, barangkali memang karna ini BBM licin skali, sampe susah butul mo dikase tuntas depe masalah. Hele mo ba usut minyak tanah yang mo dibawa ka kampung laen saja, macam pe suak skali, sampe mo pangge itu bos yang satu saja, rupa bikin kalangkabut patugas. Barangkali juga, karna kalu mo bakase tuntas kasus BBM bikin suak patugas, jadi ada yang barangkali bapikir enteng, kase biarjo itu kasus penimbunan BBM yang baru digerebek, kon te usahjo diproses, karna so pasti bikin suak. Apalagi kalu ba urus BBM, memang bikin ini badan deng pakean jadi babau minyak. Sudahjo kalu ba urus toko yang bajual minyak wangi, pasti ini badan deng baju jadi babau minyak wangi. Tapi kalu ba urus solar, so pasti ini badan deng baju jadi babau solar. Yah, daripada bikin susah bacuci baju, barangkali memang sangaja itu kasus dianggap so te ada…**