Cuma Bikin Rugi

Dari pertama so pe banyak anggota dewan yang bicara kalu ini fraksi te bisa dirombak-rombak lagi, karna memang so diatur bagitu. Tapi karna ada kapantingan yang pe banyak skali, itu ide mo barombak fraksi tatap jadi bahan carita, kon karna so baku karaas akan pandapat, terpaksa musti pigi ditanya sama pamarentah pusat yang bakase kaluar depe aturan yang balarang babongkar fraksi. Dan ternyata, dari yang om susupo dengar kamarin, itu dua kantor di Jakarta yang so dipigi akan, tatap bakase jawaban kalu ini fraksi memang te bisa dibongkar-bongkar lagi sampe abis periodenya DPRD.

Om susupo anggap luar biasa juga sama ini pimpinan dewan yang tatap batarima ide supaya itu soal fraksi mo pigi ditanya sama pamarentah di Jakarta. Luar biasa, karna memang cuma mo pigi batanya satu pasal yang mustinya so pe jelas skali, tatap dorang bikin. Padahal, kalu om susupo te salah, itu pimpinan dewan samua sarjana hukum. Baru bagimana dorang pe ilmu hukum, kon hele mo pikir akan satu pasal yang depe pasal penjelasan juga so tatulis pe jelas skali, baru kon masih pigi ditanya.

Memang te apa-apa juga kalu mo pigi batanya ulang. Cuma kan mustinya juga, ada perasaan malu mo tanya sesuatu yang so pe jelas. Jadi om susupo pikir, macam te ada depe guna itu ilmu hukum yang dorang ada balajar akan, kalu hele mo ba artikan satu pasal yang so jelas skali, musti pigi batanya lagi ka Jakarta. Depe luar biasa lagi, kan kalu mo cuma mo batanya, di Luwuk saja pe banyak ini ahli hukum, baru kanapa kon musti pigi batanya ka Jakarta. Om susupo sandiri jadi kuatir, jang-jang memang ini dorang pigi batanya lagi, karna memang dorang masih ragu deng dorang pe ilmu hukum. Baru buat apa pigi skolah sampe pe mahal-mahal, kon depe akhir, depe penguasaan ilmu sandiri dorang te parcaya.

Tapi te apa-apalah kalu cuma soal dorang pe ilmu hukum yang memang dorang ragukan sandiri. Yang sebenarnya bikin pusing, ini soal doi daerah yang musti tapake sampe ratusan juga, cuma buat mo pigi batanya satu pasal yang so pe jelas skali. Mustinya ada perasaan krisis, deng cara bahemat doi daerah. Jang mentang-mentang ada hak pigi konsultasi, baru hele cuma mo konsultasi satu pasal yang so jelas skali, musti ka Jakarta. Coba pake ini orang Luwuk yang ada ilmu hukum, kan banyak yang di Untika deng Unismuh. Supaya ini daerah juga te rugi. Skali lagi, om susupo juga tau, itu konsultasi memang hak. Itu doi perjalanan dinas juga hak. Tapi kalu ba kase abis saratusan juta, cuma buat mo batanya satu pasal, macam pe boros skali. Kira-kira, depe tujuan memang cuma mo batanya satu pasal, atau so campur supaya bisa papasiar ka Jakarta deng doi rakyat...Kan rugi juga, kalu ka Jakarta baru cuma mo pigi batanya satu pasal, yang mustinya bisa pake telpon saja...Jadi so itu, barangkali memang so campur pasiar ee...??**