Jang Asal Sanaang

Biar sempat pusing bapikir akan ini wakil rakyat yang ada bapake ratusan juta doi rakyat cuma buat mo pigi batanya satu pasal di Jakarta, tapi om susupo salut juga, karna ada diantara anggota dewan yang sempat babatanya masalah lain sama ini pajabat di pamarentah pusat. Macam soal itu naskah akademik, yang orang pamarentah di Luwuk bilang te wajib buat badampingi Raperda. Tapi sarta ditanya, ternyata itu pajabat pusat bilang, itu naskah akademik wajib, kacuali buat Raperda APBD, Raperda yang mo bacabut Perda yang so te bagus, atau Raperda tentang perubahan Perda. Jadi, diluar tiga model Raperda itu, ternyata wajib dibikin akan depe naskah akademik.
Om susupo biar cuma skolah kede-kede tapi bapikir juga, kalu itu penelitian memang parlu sebelum babikin Perda, supaya itu Perda bukan dibikin karna cuma mau-maunya orang tertentu, tapi karna memang so pantas mo dibikin. Macam ini soal Perda PT Banggai Sejahtera, om susupo rasa-rasa, memang parlu skali ada depe penelitian, kon yang babikin penelitian, so pasti musti yang memang diakui depe kahebatan baru memang independen. Jang sampe juga, karna so dikase wajib musti ada depe naskah akademik, baru so mulai bakase muncul pikiran baru, yang penting bikin-bikin saja. Om susupo pikir, itu naskah akademik lebeh bagus kalu dibikinnya peneliti yang memang depe otak independen kon tajaga butul, baru te batarima pesan-pesan sponsor.Jang sampe, ada yang babikin penelitian, tapi blum diteliti so bisa tabaca apa depe hasil, karna memang ada depe sponsor yang bapasaan supaya depe hasil kase-kase bagus saja.
Yah om susupo cuma mo kase ingat, kalu memang so ada depe tukang teliti yang mo babikin itu kajian akademik, jang bapikir soal waktu. Jang karna so diparlu skali, baru somo dibikin sambarangan, asal jadi, kon asal bikin sanang yang bapasaan.
Kalu memang mo bateliti, teliti bae-bae, apa memang so pantas mo babikin itu perusahaan daerah baru, kon teliti juga, kira-kira ini perusahaan memang so parlu skali mo dibikin buat daerah pe kapantingan, atau cuma buat mo baku tampung akan ini orang-orang yang so tabuang alias so te dipake, atau juga dipake batampung tamaan-tamaan yang blum badapat tampat. Kalu cuma mo dibikin sambarangan, lebeh bae kase rekomendasi blum pantas dikase badiri itu perusahaan baru. Jang sampe, penelitian cuma bikin kase sanang orang yang babayar itu proyek...Kalu memang butul-butul layak, bilang bagitu, tapi kalu memang te beres, bilang juga bagitu ee...**