Tambahan buat sapa ?

Te dirasa, ini taon 2012 so bajalan sambilan bulan, kon te lama lagi om susupo dengar ini om susupo pe daerah somo babahas lagi APBD Perubahan. Yah, tantu somo ada doi buat tambahannya APBD. Om susupo pikir bagus juga kalu so ada tambahan doi lagi, berarto somo tatambah ini pembangunan buat kaparluannya rakyat kacili macam om susupo. 

Cuma om susupo jadi stress, sarta badengar ada yang bacarita kalu itu tambahan yang mo disiapkan buat di APBD Perubahan ini, cuma lebeh banyak buat kaparluannya pagawe deng pamarentah itu sandiri. Bayangkan, ada yang bacarita kalu buat pagawe ada tambahan angka yang pe banyak skali sampe bamilyar-milyar. Ada juga om susupo dengar soal tambahan doi buat mo pake balanja kendaraan dinas. Tapi giliran tambahan buat rakyat pe kaparluan, ebee kasian skali depe angka. Macam itu buat aer bersih pedesaan, om susupo dengar-dengar, depe bocoran angka cuma 4 juta. Bee kalu bagitu barangkali cuma cukup buat babili akan pipa aer deng karan barapa biji. Kalu mo pake buat babikin bak aer saja, om susupo pikir rupa te cukup. 

Om susupo te mangarti juga deng ini jalan pikirannya pamarentah, karna ini tambahan doi ternyata lebeh banyak buat kaparluannya pamarentah itu sandiri. Cuma sarta om susupo merenung, wajar kalu om susupo te mangarti deng ini jalan pikirannya pamarentah. Om susupo kan bukan pamarentah, jadi so pasti susah mo mangarti akan deng ini pamarentah mulai dari depe jalan pikiran sampe depe kaparluan. 

Om susupo bingung juga, kalu rakyat kacili macam om susupo so susah mangarti deng jalan pikirannya pamarentah, baru kira-kira om susupo musti mo baharap sama sapa. Karna om susupo pe pikiran yang kasian cuma skolah apa adanya ini, masih ba anggap kalu pamarentah pe tugas kan buat bakase jalan ini pembangunan, buat balayani rakyat pe kaparluan, buat ba urus rakyat pe kabutuhan, buat bajaga rakyat. Cuma kalu doi rakyat yang pamarentah ada urus-urus, so lebeh banyak buat kaparluannya pamarentah sandiri, baru so bagimana deng itu tujuannya pamarentah yang musti ba urus rakyat pe kaparluan. 

Atau ini rakyat barangkali memang so te bisa baharap banyak sama ini pamarentah buat mo ba urus rakyat pe kaparluan. Karna hele kaparluannya pamarentah sandiri, rupa te abis-abis, jadi bagimana mo baku urus deng rakyat pe kaparluan. Liat saja ini jalan yang rusak, so pe banyak yang mengeluh akan, ebee ini keluhan rupa cuma dianggap radio rusak. Om susupo pikir-pikir, barangkali ini rakyat kacili memang musti baku urus deng depe kaparluan sandiri, kon so te bisa talalo banyak baharap. Karna kalu talalo mo baharap juga, yang salalu kadengaran, ini doi te cukup, baru kaparluannya rakyat banyak skali. Cuma yang bikin heran, kalu macam buat ba bili kendaraan dinas, rupa ada turus tiap taon…bagimana itu ee ??**