Carita pongko…

Ini Luwuk memang luar biasa depe hebat. Depe kemajuan, bikin banyak orang yang baru ba injak ini kota ta’heran-heran. Yah kandati ini jalan yang mo kaluar kota atau mo ka kampung-kampung so tabulengkar abis, tapi jalan di tengah kota masih lumayan depe mulus. Ini bisnis, banyak yang bilang depe perkembangan so pesat skali. Dan memang kaliatan skali, karna hele bangunan pertokoan ada baku rampas badiri, kon mulai baku tanding paling basar. Bacarita soal pendidikan, te usah dibilang lagi. Ada barapa kampus perguruan tinggi yang so hebat-hebat, sampe ada yang jadi bangunan paling tinggi di tengah kota, selain tower tantu… Om susupo saja, kandati orang Luwuk asli, biasa jadi tasalah langkah kalu bajalan ditengah kota, terutama kalu te ada doi. Mo liat depe lapangan terbang, barangkali so jadi lapangan terbang di kabupaten yang paling rame di Sulawesi. Pokoknya, ini kemajuannya Luwuk memang so hebat abis…
Cuma yang bikin om susupo pusing, kandati so hebat ini kota, kon depe warga juga so kaliatan modern, so pake baju-baju modiz, pake-pake Hp yang canggih, ebee ternyata masih gampang tapengaruh cuma deng carita soal pongko. Om susupo ada babayangkan, itu carita pongko rupa so jadi carita puluhan taon lalu, jadi mustinya so te laku kalu mo dicarita skarang ini, apalagi kalu sampe babikin heboh ini kota. Cuma so itu, ini kemajuan yang orang bilang hebat, ternyata te mampu bakase hebat ini cara bapikir. Isu pongko ternyata masih bisa babikin kalangkabut orang-orang yang tinggal di kota yang pe hebat bagini.
Kon yang bikin om susupo tambah pusing bapikir akan, ini isu juga sampe jadi carita di kampus. Noh bayangkan sandiri, so bagimana itu kalu kampus yang om susupo tau, biasa bapikir akan yang rasional, kon so sampe bacarita tentang pongko. Memang te ada masalah bacarita apa saja di kampus, tapi yang om susupo dengar-dengar, itu kampus mustinya identik deng tradisi ilmiah. Tagal itu om susupo fans skali kalu ini mahasiswa yang jadi aktifis, karna dorang pe pikiran memang rasional kon salalu bapikir akan kondisi yang memang ada kaliatan, macam ini kasus korupsi, kasus APBD, kasus pelayanan umum, sampe kasusnya buruh deng macam-macam orang yang biasa ada disuarakannya mahasiswa. Tapi kalu so bacarita soal pongko, haa ini yang om susupo te mangarti. Karna te mungkin pongko mo dibahas pake cara ilmiah.
Om susupo saja yang cuma skolah kede-kede, so mulai bapikir yang rasional. Cuma memang kalu talalo banyak manonton itu sinetron mistis, biasa memang ada yang tapengaruh, kon akhirnya so baku ikot kalangkabut ini pikiran. Depe jadi, hele tas cerewet terbang karna angin ada tiup-tiup, bisa jadi so dapat sangka setan yang ada malayang-layang…**