Jadi Kabiasaan…

Om susupo yakin, samua orang pasti stuju deng program pembangunan yang dibikin buat kabutuhannya rakyat. Kalu ada yang te stuju, so pasti itu orang yang te beres depe otak. Karna hele so ada program pembangunan buat rakyat saya, masih tarasa kurang, apalagi kalu te ada program pembangunan.
Tagal itu, om susupo pasti badukung programnya pamarentah yang mo dibikin buat rakyat pe kaparluan.
Cuma biar lagi buat kaparluannya rakyat, itu program pembangunan yang ada bapake doi rakyat, tatap musti dibikin pake aturan, depe tahapan musti baku ikot deng proses pengelolaan keuangan yang diaturnya aturan. Yah, macam mo babikin program, tantu musti distujui dulu depe doi di rapatnya dewan, karna itu dewan yang memang ada depe wewenang mo babahas kon ba stujui anggaran. Kalu blum dibahas, kon blum ditetapkan, baru so langsung baku bikin perjanjian lengkap deng depe waktu pelaksanaan sampe depe jumlah doi yang mo tapake, tantu kalangkabut juga.
Skali lagi, om susupo yakin, samua stuju deng program pembangunan yang dibikin buat kaparluannya rakyat. Tapi tantu ada depe proses yang musti baku ikot deng aturan.
Slama ini, om susupo babaliat ada program pembangunan yang rupa main langsung bikin, padahal blum dibahas deng ditetapkannya dewan.
Om susupo kuatir, kalu kabiasaan potong kompas dibikin, lama-lama so baku ikot turus, kon makin banyak program yang langsung dibikin, langsung main patok angka, padahal dewan yang orang bilang ada hak budget, blum barapat akan.
Om susupo cuma mo baku kase ingat, jang sampe ini dewan dibikin jadi serba susah. Mo baku ikot stuju biar te babahas, somo dibilang tukang stempel, baru kon mo babahas sampe bakritisi butul-butul, bisa muncul anggapan kalu dewan bahalangi itu program. Tagal itu, om susupo cuma bapikir, mustinya samua lembaga baku hargai deng tahapan, jang sampe ada yang main potong kompas. Karna biar lagi program yang dibikin buat kaparluannya rakyat, tatap juga musti baku ikot deng tahapan proses penentuan depe doi. Apa gunanya juga babikin program bagus buat rakyat, kalu musti bakase biasa balanggar aturan.
Cuma kalu memang so te parlu pake dewan pe pembahasan, yah lebeh bae kalu ada depe doi, te usah dikase maso di APBD atau APBD-P, supaya te parlu dibahas. Barangkali memang bisa langsung main karja saja, te parlu pake proses di dewan, supaya jang dewan yang kalangkabut karna bingung mo baku ikot langsung stuju, atau masih mo baku bahas lagi.**