Ebee, so balobang lagi…

Om susupo heran juga baliat ini jalan ka Pagimana, so taon-taon rupa babagitu turus depe model. Pokoknya suak skali balewat akan itu jalan. Baru mo kaluar Pagimana ka arah Luwuk saja, so pe kalangkabut ini badan, karna itu jalan yang minta ampun depe rusak, kon bikin oto deng motor rupa ada badisko. Yah memang ada yang sementara dikase bae kon mo dibikin baru, macam itu ruas dari Poh mo ka Salodik. Tapi so itu, skarang ini depe jalan so bikin suak skali dilewat akan. Hele oto deng motor saja, kalu bisa manangis, barangkali dorang so manangis balewat akan itu jalan yang ada batanjakan, baputar-putar akan gunung, kon depe rusak minta ampun. Om susupo cuma baharap, jang talalo lama kasian kalu mo bakase bae atau babikin ulang jalan, karna ini yang balewat akan akan rupa mandarita skali. 

Cuma yang bikin om susupo heran skali, itu jalan dari dekat pertigaan Kamumu ka arah Salodik yang ada ta aspal mulus taon lalu, eh so mulai babalobang lagi. Ini kan jelas bikin heran, karna baru stau taon di aspal mulus, kinapa kon skarang so mulai balobang. Depe sambungan ka arah Poh baru mo dibikin, eh depe jalan yang dibikin taon lalu so mulai rusak lagi. Om susupo sempat baliat ada yang babawa motor laju-laju karna jalan so mulus, langsung takaget karna ada lobang-lobang di jalan aspal itu.

Om susupo masih sempat badengar dia batariak kon bamaki pas depe bola motor tacolo dilobang, cuma te tau sapa yang dia maki.

Memang bikin heran juga, ada jalan yang ta aspal gagah taon lalu, kon baru satu taon tapake, so mulai rusak lagi. Kalu bagitu depe model, pas abis diaspal depe sambungan yang ka arah Poh, so musti dikase bae lagi jalan yang ada tabikin taon lalu itu. Atau bisa juga, blum jadi depe sambungan, jalan yang so ta aspal so musti diparban lagi, supaya te balobang. 

Om susupo pusing juga, kanapa kon bisa bagitu itu jalan ? kanapa kon blum lama dipake baru so rusak ? kanapa kon pe capat skali balobang ? Om susupo sampe heran juga deng ini lobang, talalo suka skali baganggu ini jalan di Kabupaten Banggai…**