Bae-bae Manguap…

Sampe skarang ini, om susupo so badengar info jelas lagi soal ini kasus minyak tanah subsidi buat rakyat Kabupaten Banggai yang rencana mo dibawa kakampungnya orang laen. Karna so barapa kali ini dipareksa, tapi blum jelas juga apa tindakannya polisi lagi. Dengar-dengar, ini oknum pajabat yang dibilang so jadi tersangka, macam so dikase biarnya polisi. Mustinya, kalu memang polisi yakin deng dorang pe proses, kase capat itu proses hukum. Kan itu proses hukum memang musti capat deng biaya murah. Jadi, kalu memang yakin, lebeh bae kase capat depe proses, supaya samua tau, kalu memang ada pajabat yang tasangkot di kasus minyak tanah.
Tapi kalu memang blum yakin, apalagi kalu te yakin, polisi juga musti bakase jelas, deng cara bakase brenti itu penyidikan,kon kase pulih itu nama baiknya pajabat yang sodibilang-bilang tersangka. Langkahnya polisi ini parlu skali rakyat kacili tau, supaya samua jadi jelas, jang sampe ini kasus manguap bagitu saja. Apalagi kalu mobicara soal minyak, samua orang perminyakan so ada babilang, minyak memang gampang skali manguap. Kalu lupa ditutup, itu bensin capat skali abis sandiri, kandati blum dipake. Cuma kalu itu minyak tanah, memang bisa manguap, tapi depe penguapan palaan skali. Haa, jang sampe ini kasus minyak tanah subsidi yang polisi bilang rencana mo dibawa ka kampung laen, juga palan-palan so manguap.
Mustinya, kalu memang ini kasus so pasti bisa ditindaklanjuti, jang lagi baku tunggu deng sagala rupa hambatan soal itu pajabat pe kasibukan. Kalu anggota dewan atau kapala daerah, memang parlu baminta izin lagi sama orang yang depe wewenang ba urus izin. Tapi kalu cuma pajabat biasa, om susupo pikir kan te parlu baku tunggu deng sagala macam tetek bengek izin, apalagi waktu babawa minyak, memang ada depe orang langsung, kon depe bukti juga dibilangnya polisi so mendukung skali. Cuma so itu tadi, kalu memang te yakin, lebeh bae umumkan saja kalu memang te ada depe tersangka, kon kase biar saja itu pajabat yang dibilang-bilang ada tasangkot, bebas kasana kamari. Jang sampe ini rakyat so mulai bacuriga macam-macam. Om susupo sandiri biasa pusing badengar ini orang yang ada batanya, parsis om susupo penyidik. Cuma karma om susupo juga mo suka tau ini kalanjutannya parkara, jadi om susupo baharap ada kejelasannya polisi. Sebab om susupo sandiri so mulai te yakin, kalu ini kasus mo diproses sampe tuntas. Tapi biar bagitu, om susupo masih mo ba usaha parcaya sama ini polisi-polisi yang memang hebat. Om susupo yakin, polisi juga mau depe pakarjaan jadi bagus, kon te brenti ditengah jalan, apalagi kalu sampe depe kasus manguap parsis minyak yang gampang manguap.
Cuma kalu memang so te yakin, jang juga bapaksa. Kalu memang so musti dikase brenti, lebeh bae kase brenti kon umumkan sama rakyat lewat itu taman-tamaan wartawan yang hari-hari baporo di Polres, kalu itu kasus so te diproses lagi. Supaya samua orang tau, kon samua orang bisa maklum. Om susupo juga pasti bisa maklum, depe nama saja minyak…**