Pengusaha Pagaga…

Ini aparat pamerintah di Kabupaten Banggai barangkali so musti main karaas sadikit, supaya orang te sambarangan balanggar aturan atau babikin sagala rupa yang te butul, apalagi kalu cuma karna ada doi banyak. Macam itu soal pengusaha yang sambarangan batimbun-timbun laut di Maahas, mustinya so harus pake Pol PP, supaya jang sambarangan babikin-bikin diri, parsis depe negeri sandiri, kon parsis depe doi yang paling bakuasa di Luwuk ini. Karna om susupo dengar-dengar, ini pengusaha yang batimbun-timbun laut memang so papaga skali, karna so brapa kali dia bikin-bikin, kon rupa te ada tindakan tegasnya patugas pamarentah. So bagitu memang depe kajadian, pengusaha jadi pagaga, karna memang pamarentah te bisa basikap tegas, apalagi kalu sampe ada yang so baku ikot barmain atau ta ikot deng permainannya pengusaha, so pasti te barani bakase tindakan. 

Ini yang terakhir, om susupo dengar-dengar, so batimbun laut lagi, kon depe alas an buat proyek jalan yang memang mo dibikinnya pamarentah. Tapi sarta ditanya sama itu pamarentah yang depe karja tukang bikin jalan, ternyata te ada yang basuruh itu pengusaha batimbun laut, apalagi itu proyek jalan memang blum ditender. Baru kinapa kon sampe itu pengusaha barani batimbun laut, sampe so barapa hari te ditogor-togornya pamarentah. Buktinya, sampe kamarin depe alat berat masih bakorek-korek tanah dipinggir laut, berarti blum ada yang batogor. Kalu memang so ada yang batogor, kon masih pagaga skali, om susupo pikir, jang-jang memang ada depe beking, sampe itu pengusaha barani skali. 

Om susupo cuma mo baharap, kalu memang pajabat pe batogor so te didengarnya itu pengusaha, berarti so musti bupati yang turun tangan. Sapa tau itu pengusaha masih badengar. Kon kalu sarta so bupati yang turun balarang, blum juga di dengar, om susupo cuma mo bakase saran, suruh itu patugas keamanan pigi tangkap itu pengusaha, kon buang kalaut saja. Karna kalu te dikase palajaran sama ini pengusaha yang pagaga kon babikin-bikin diri parsis cuma dorang yang jadi depe tuan ini kota, kon yang laen dorang anggap cuma basewa atau cuma ba kos, berarti so musti hukum yang bakase tindakan. Karna kalu te dikase tindakan, om susupo kawatir juga, lama-lama so makin sambarangan ini kalakuannya pengusaha. Mentang-mentang dorang ada doi, ada sagala rupa alat, baru so babikin pakarjaan apa saja yang dorang suka. Kon kalu so sampe bagini depe pagaga, te ada jalan laen, kacuali rakyat yang babikin hukum sandiri. Atau, kalu memang so dianggap boleh sambarangan, suruhjo rakyat yang pigi bakapling itu laut, kon bikin buat apa saja yang dorang suka, te usah lagi ada yang dilarang-larang. 

Tagal itu, kalu memang ini pamarentah masih ada depe wibawa, capat kasian atur ini pengusaha yang sambarangan, jang dorang bakase liat depe jago deng depe pagaga turus-turuus. Karna kalu rakyat so bosan baliat yang sambarangan, rakyat yang memang tuannya ini Republik Indonesia, bisa mangamuk kon babikin tindakan sandiri…Kasian akan ini Luwuk, jang tunggu rakyat mangamuk baru mo ada tindakannya pamarentah…**