Jang jadi uang kaget

Om susupo kaget juga badengar katarangannya anggota dewan Luwuk di rapat kamarin, yang ada babilang soal jumlah doi di pos balanja tak terduga so nae luar biasa, dari cuma 300 juta waktu di penetapan, kon di perubahan so tatambah jadi 6 miliar lebeh. Karna depe tatambah luar biasa, so pasti memang parlu ditanya.
Memang itu pajabat keuangan ada babilang, itu doi di pos balanja tak terduga yang so tatambah banyak, cuma doi titipan yang te tapake, karna depe proyek te jadi dibikin, jadi musti dikase pulang sama pamarentah pusat. Karna buat mo tunggu surat penarikannya pamarentah pusat, jadi depe doi disimpan dulu di pos balanja tak terduga.
Yah om susupo yang awal deng ini soal arus maso kaluar doi daerah cuma bapikir, bagus itu depe nama pos, karna dikase nama pos balanja tak terduga. Kalu yang ada dipikirannya om susupo, itu pos memang depe isi doi yang yang bisa dipake kalu ada yang mo suka dibili, tapi te tacatat dari pertama depe kegiatan. Tagal itu dikase nama pos balanja tak terduga.
Om susupo sempat bahayal, ini barangkali amper sama deng uang kaget yang biasa orang-orang ada bilang waktu batarima doi, tapi dari sumber yang te pernah tapikir. Macam tiba-tiba baku temu deng orang bae hati kon langsung bakase doi, itu bisa dibilang uang kaget.
Cuma memang om susupo baharap, itu pos balanja tak terduga, te sama deng doi kaget. Karna yang om susupo khawatir skali, kalu sampe depe model macam doi kaget, ini tantu kalangkabut. Bayangkan, kalu depe model sama deng doi kaget, berarti tiap ada pajabat yang takaget, bisa langsung bapake itu doi di pos balanja tak terduga. Atau barangkali ada yang mendadak mo suka babili barang tertentu, dia langsung baminta doi di pos itu. Mudah-mudahan te sama deng model bagitu ee.
Trus terang, om susupo masih babatanya, ini bagunakan doi daerah yang tasimpan di pos-pos yang ajaib macam pos tak terduga itu, kira-kira te rawan deng cara bapake yang sambarangan. Karna depe nama kegiatan te jelas, depe barang yang mo dibili juga te tatulis dari pertama, pasti jadi pertanyaannya orang. Blum lagi soal sapa yang batentukan, ada kajadian yang te’ terduga, kon musti bapake doi di pos balanja tak terduga itu. Kajadian apa juga yang maso kategori tak terduga, sampe bisa bapake doi di pos itu buat depe biaya. Samua masih jadi bahan pikirannya om susupo.
Om susupo sandiri bahayal, bayangkan kalu om susupo pajabat, kon mo suka barang tertentu, barangkali so pos yang babagitu yang deng gampang mo dapat akan depe dana. Apalagi kalu so amper-amper abis taon anggaran, kon ada yang mo disuka dibili, barangkali depe doi bisa dapat di pos-pos yang bagitu.
Om susupo cuma baharap, mudah-mudahan apa yang om susupo hayalkan ini, te butul bagitu depe kajadian. Mudah-mudahan, itu doi-doi yang ada diteru di pos balanja tak terduga, te jadi doi kaget yang deng enteng dipakenya oknum tertentu buat depe kasanangan sandiri…**