Hmm..Oto dinas lagi

Luar biasa ini Luwuk, ini oto dinas yang rupa so pe banyak skali ada lalulalang kasana kamari, sampe ada yang depe tampat biasa kaliatan di pasar, ternyata masih dianggap kurang.
Om susupo dengar, oto yang ada dibili pake doi rakyat waktu penetapan APBD lalu, ternyata masih te cukup, tagal itu mo ditambah lagi di APBD Perubahan ini. Ini yang om susupo anggap luar biasa butul, karna hele di pembahasan perubahan, yang biasanya jadi tampat babahas hal-hal penting yang so parlu skali disadia akan depe doi karna memang so parlu skali, masih juga dorang sisip akan doi buat babili oto dinas. Rupa so te ada yang talalo penting, rupa so te ada kaparluannya rakyat yang lebeh parlu, rupa ini rakyat so sejahtera skali, rupa ini fasilitas umum so pe bagus skali, sampe dianggap so oto yang jadi kaparluan berikut.
Om susupo te mo sirik, karna om susupo juga bukan pajabat pamarentah, bukan juga pagawe negeri. Tagal itu, om susupo memang te pernah mo baharap badapat kandaraan yang depe plat merah. Cuma sebagai rakyat kacili, om susupo rupa bingung baliat ini caranya pamarentah ba urus doi rakyat. So pe banyak skali ini doi yang tapake buat balanjanya pagawe, ebee masih ditambah lagi deng balanja-balanja oto dinas yang rupa te abis-abis. Parsis ini doi daerah ada tabuang-buang, kon so te ada yang lebeh penting yang mo dibili, sampe so oto dinas yang jadi pikiran tatap, tiap babahas anggaran. Kanapa kalu buat oto dinas, rupa te ada kata, uang te te cukup. Tapi kalu buat usulannya rakyat yang biasa ada dibilang-bilangnya rakyat sama pajabat deng anggota dewan, salalu muncul kalimat, karna banyak usulan baru ini anggaran terbatas, jadi nanti diliat-liat dulu, mudah-mudahan bisa dianggarkan taon ini.
Salalu itu kalimat rakyat dengar, karna kalu buat usulannya rakyat, depe doi memang te pernah cukup. Tapi kalu buat kaparluannya pajabat, rupa te ada kata doi te cukup. Kon yang bikin heran, amper tiap taon juga ada oto dinas yang dikase swastakan, dikase sama pajabat yang pansiun. Kalu bagini depe model turus, so pasti ini oto dinas memang musti dibili tiap taon, karna cuma deng alasan so lima taon, baru so bole di kase swastakan buat pajabat.
Om susupo cuma kadang babatanya dalam hati, kira-kira kalu ini pamarentah te babili oto dinas barang dua atau tiga taon, ini pamarentahan somo lumpuh kira-kira. Yang juga jadi garap didengar, pajabat di daerah lain jadi perbandingan. Om susupo pikir, kalu memang di daerah laen lebeh bagus depe fasilitas buat pajabat, yah bapindah saja kasana, te usah di Luwuk yang depe fasilitas dianggap te bagus.
Coba kalu boleh juga, ini pajabat bapikir saja babili oto sandiri, kon kalu memang te mampu babili cash, ba kredit kasana.
Cuma yah, kalu memang so bagini ini modelnya pajabat, mo di apa lagi…Yah, baumo tatu, buat kaparluannya rakyat memang salalu kabalakang…**