Urusan Kukis…

Om susupo juga bingung, kalu urusan bajual kukis, so musti pajabat tinggi skali yang mo baku bikin surat buat bakase tertib. Te tau juga, ini yang depe nama kinerja maksimal, pelayanan prima atau apa. Cuma bagi om susupo, rupa so kurang karja, kalu so sampe urusan bajual kukis deng sayor masak buat babuka puasa, yang musti di urusnya pajabat penting skali itu.

Padahal yang om susupo liat, ini urusan yang depe penting minta ampun, ada banyak skali. Yah, macam ini soal bakase tertib ini pagawe yang lambat-lambat maso karja bulan puasa, pagawe yang capat pulang deng alasan mo baku urus deng buka puasa, atau pagawe yang ada kasana-kamari di pasar pas jam karja. Masalah lain yang parlu di urus, tantu soal pelayanan administrasi buat kaparluannya masyarakat di kantor-kantor. Kalu soal panjual kukis deng sayor masak yang cuma muncul pas bulan puasa bagini, om susupo rasa te usahjo talalo bikin sibuk ini tukang bikin kebijakan. Om susupo stuju deng itu katua dewan yang ada babilang, santai saja, ini papanjual kukis yang so bapake trotoar buat tampat bajual, cuma kaliatan bulan puasa. Te parlu disuruh bongkar, abis puasa atau somo dekat-dekat hari raya, so pasti dorang bongkar sandiri depe tampat bajual.

Yah,kalu soal ada tampat yang rame skali, ada yang rame sadikit, kon ada yang sepi, itu tantu tergantung pembeli juga, dimana dorang mo suka babili akan. Om susupo yakin, samua kukis yang dijual, mo yang di Lalong, di Jole, di Kilo satu, di Maahas, di Hanga-Hanga atau di tampat laen di Luwuk, so pasti sadaap depe rasa. Cuma tiap orang tantu ada depe pilihan. Tagal itu, tergantung yang mo babili juga, dimana yang dia mo pigi akan. Macam yang mo suka nasi jaha, tantu dorang so tau, depe tampat yang sadaap depe rasa di Maahas. Biar dipuleo depe otak supaya pigi ka swalayan, so pasti dia tatap ka Maahas, karna di swalayan memang te bajual nasi jaha.

Jadi om susupo cuma mo bakase saran, ini pamarentah lebeh bagus konsen sama depe tugas pamarentahan. Soal orang bajual kukis buka puasa, toh cuma satu bulan ini. Te parlulah mo baku larang deng alasan so pake trotoar. Kalu kalu mo pake alasan itu, om susupo liat ada yang lebeh parah, macam di pertokoan yang so hari-hari pake trotoar deng jalan buat tampat parkir, parsis dorang pe garasi pribadi, atau jalan di Pasar Simpong yang so jadi tampat bajual, trotoar di Lalong yang so jadi café, tanah negara di Tanjung yang so punuh deng bangunannya orang, tanah bekas taman makam pahlawan yang so te jelas depe status, atau urusan laen yang lebeh penting. Skali lagi, biarjo kasian ini papanjual kukis atau papanjual perlengkapan shalat yang mo mancari tambahan rejeki di bulan puasa. Te usahjo ada yang mo baku-baku larang, cuma deng alasan trotoar, toh cuma satu bulan juga…**