Bulan Baliho…

Om susupo biasa badengar ceramahnya ini ustad-ustad yang ada babilang sagala rupa keistimewaannya ini bulan Ramadhan. Mulai dari pahala yang dorang bilang ada balipat ganda sampe sagala rupa nama atau symbol buat bulan puasa,macam bulan yang bisa jadi tampat ba ibadah puas-puas, bulan yang pool deng ampunan, bulannya baku bagi deng orang yang susah, bulan yang pool depe berkah, bulan yang punuh deng putaran rejeki, bulan yang jadi panjaranya setan-setan atau setan-setan jadi suak kalu mo bagodah manusia, deng sagala rupa yang laen laen.

Om susupo yang ada babajalan tiap sore ada babaliat kukis pembuka puasa yang sadaap, memang baliat ini berkah yang luar biasa. Ini orang yang mancari deng bajual kukis atau baju kokoh, lumayan depe penghasilan. Paling tidak om susupo liat dari orang yang banyak takumpul. Soal barapa yang babili, om susupo te bahitung lagi, karna bukan om susupo pe urusan. Apalagi ada juga yang blum tengah hari so badapat pembeli, macam warung-warung yang sama depe muka ada kaliatan banyak skali motor parkir. Kan kesempatan, karna warung yang laen ada batutup karna bahormati bulan puasa, ada warung yang justru babuka dari pagi, kon badapat untung bazaar dari pembeli yang te bapuasa. Ini barangkali juga berkah ee, paling tidak buat warung yang te batutup waktu pagi sampe tengah hari.

Cuma yang so dekat-dekat akhir bulan puasa ini, om susupo liat, so ada predikat laen buat ini bulan puasa. Om susupo pikir, boleh juga dibilang ini bulan baliho. Coba liat dari ujung kota sampe diujung kota, ini baliho rupa ada baku tanding badiri, baku tanding basar, baku tanding gagah, kon barangkali juga ada yang so rupa baku tanding depe penampilan. Ada juga yang macam baku tanding banyak baliho, karna om susupo liat-liat, ada yang depe muka kaliatan diamper samua tampat. Barangkali memang te salah kalu dibilang bulan baliho. Yah, ini yang babikin ucapan dibaliho, tantu bapikir depe berkah deng kelengkapan puasa, karna baku pangge silaturahmi, baku bilang minta maaf, baku bilang kasih sayang, kon samua orang bisa babaca. Jadi karna samua deng enteng bisa babaca, tantu kan so satukali deng babikin pencitraan. Apalagi kalu yang depe baliho memang banyak skali. Berkah paling basar tantu didapatnya tukang bikin baliho.

Tagal itu, om susupo stuju kalu ini bulan puasa dibilang bulan yang pool deng berkah, karna dari tukang baliho, tukang sadia tampat sampe tukang panjat baliho, samua badapat berkah. Cuma om susupo mo kase ingat, kalu ada babajalan pake oto deng motor, jang talalo bahaga kuat ka baliho, mo tatabrak kasian…**