Oh so ada yang punya…?

Om susupo ada liat-liat, rupa pe banyak ini asset yang dulu biasa dibilang negara punya atau daerah punya, tapi skarang rupa so ada depe tuan laen, selain negara deng daerah.Yah, macam itu tanah di komplek taman makam pahlawan, yang om susupo pernah dengar caritanya orang-orang tua, itu negara punya, kon daerah yang urus, karna memang dipake buat bakubur ini bekas pejuang atau bekas aparat negara yang depe jasa buat daerah basar skali. Tapi kalu mo liat skarang, ebee rupa so taganti deng rumah-rumahnya orang, gudang-gudangnya orang, pokoknya yang bukan pamarentah punya lagi.

Di tampat laen, om susupo juga ada liat kasus sama. Macam di pasar sentral, so pe banyak itu lokasi dalam pasar yang so jadi rumahnya orang. Padahal dulu ada depe pasar sayor, pasar yang babajual baju, sembako sampe pasar ikan lengkap deng depe tampat pelelangan ikan. Tapi skarang, te tau ini pamarentah masih catat jadi dorang punya, atau memang so dikase-kase sama orang laen. Karna kalu om susupo liat, rupa pamarentah so te mo urus-urus lagi, kon so dikase biar.

Om susupo juga ada liat, ada kantor yang dibikin pake doinya rakyat di tengah kobon kalapa, kon skarang ada dikase-kase biar, so te diurus. Jang-jang so jadi tampatnya panjahat ada barunding.

Yang bikin om susupo pusing, ini masalah yang so jelas-jelas bikin daerah rugi, karna yang terancam ilang itu asset daerah atau negara punya, macam tanah di tanjung, komplek pasar deng tampat balelang ikan, sampe bangunan-bangunan yang dibikin pake doinya rakyat, bukan doinya pajabat, tapi rupa te bikin pusing kapalanya pajabat. Blum lagi itu baku timbun laut sambarangan yang so samua kantor pamarentah ada babilang illegal, tapi cuma abis di babilang illegal deng bakase kaluar surat pelarangan, padahal apa yang mo dilarang lagi, itu batimbun laut so bajalan. Mustinya kan so parlu deng tindakan, kalu parlu pake jalur hukum. Cuma memang bikin om susupo barasa heran juga, urusan yang mustinya pake jalur hukum ka polisi, macam ini batimbun laut, eh cuma sekedar abis disurat. Masih untung ini polisi memang luar biasa depe karja, jadi dorang so ambe inisiatif ba bikin penyelidikan. Tagal itu, om susupo jadi salut deng polisi yang langsung baselidiki kasus batimbun laut.

Cuma kalu soal asetnya daerah yang somo amper te jelas depe model, om susupo so te tau juga bagimana depe status. Om susupo juga somulai bapikir, barangkali memang ada yang so bukan pamarentah punya, tagal itu so ada depe tuan yang laen. Yah, macam itu komplek pasar sentral, rupa so bukan pamarentah punya, karna memang cuma dikase-kase biar bagitu turuuss…Om susupo rupa manyasal juga, kanapa te baku ikot bakapling…**