So Boleh Ganti

Kalu diliat dari jaoh, ini pamarentah pe bajalan memang normal. Tiap bulan depe pagawe ada batarima gaji. Tiap hari juga depe pagawe ada pake baju dinas kon ada bakantor. Tiap hari juga itu oto dinas ada tapake deng sibuk, berarti memang depe orang ada sibuk ba urusan dinas. Mudah-mudahan bukan sibuk ba muat minyak. Kalu ditanya sama ini orang-orang tertentu, pasti akan babilang ini juga kalu ini pamarentahan ada normal-normal.
Cuma sarta om susupo liat bae-bae, macam memang so parlu dikase bae kasian. Yah kalu mo bakase bae, tantu depe system karja yang diurus, kon kalu parlu depe orang juga soboleh ada yang diganti dulu deng yang lebeh bagus.
Karna om susupo saja ada babacatat ini masalah yang rupa te beres. Macam ini soal pertambangan, bukan abis depe masalah, tapi macam pe banyak skali yang kalangkabut depe urusan akhir-akhir ini. Bagitu juga soal mutasi, tantu ada yang so tasalah, kon sampe itu kapala daerah yang blum lama bajabat, eh so kana gugatan kon kalah lagi. Yah memang masih ada baku lawan di tingkat banding, tapi yang jelas so pernah kalah di tingkat pertama. Blum lagi soal ini kayu yang ada dibaribut akan, soal pajabat yang bamuat minyak pake oto dinas, soal usul pemekaran yang juga so musti bikin suak banyak orang, karma ini rakyat so sampe bapalang jalan dulu baru didengar. Kalu babaliat ini catatan, om susupo pikir, barangkalai memang lebeh bae kalu ini pimpinan daerah parlu baevaluasi depe bawahan, kon kalu memang te beres diliat, yah jang malu-malu baganti pajabat yang te bagus depe karja. Karna kalu yang te beres mo dijaga-jaga akan depe jabatan turus, lama-lama kan justru bikin rugi programnya pimpinan. Karna kalu so jadi kalangkabut, ini rakyat baliat yang mustinya batanggungjawab tantu depe pimpinan, bukan depe anak buah yang cuma dikase jabatan. Blum lagi ini programnya pamarentah yang mo bakase gratis baobat deng skolah yang sampe skarang cuma jadi hayalan, mustinya juga parlu dipikirnya kapala daerah. Kalu memang te jelas depe konsep, kon memang te mampu modibikin, kan lebeh bae mangaku, supaya rakyat so te batuntut lagi. Rakyat juga somo mangarti akan, kalu memang te bisa dibikin, berarti itu memang cuma hayalan turuus.
Jang juga ini pajabat yang pe kalangkabut, tatap mo dikase kursi yang enak turuus, padahal dorang pe karja so sampe bikin pusing kapala daerah. Coba skali-kali bikin itu uji kelayakan deng kepatutan, supaya kaliatan mana pajabat yang memang ada visi mo bakase sukses depe program, deng mana pajabat yang cuma mo baku incar jabatan, sampe basiul-siul dipinggirnya pimpinan turuus, supaya diperhatkan. Padahal sarta dikase kadudukan, eh te beres depe karja. Soboleh ganti kalu yang babagini ini ee…**