Menghayal Lagi ?

Om susupo dengar-dengar, so mulai ada lagi yang mo ba urus soal ini Sultim supaya mo jadi provinsi. Yah, om susupo salut juga deng itu rencana. Dan namanya juga usaha, so pasti om susupo badukung. Sapa juga yang ada tinggal, banapas, mancari, kon badapat penghasilan di daerah Sultim ini baru te mo badukung Sultim jadi provinsi. Om susupo yang memang lahir, skolah kon basaar di Sultim, pasti juga badukung supaya ini Provinsi Sultim badiri, kon talapas dari ini Provinsi Sulteng yang depe ibukota Palu.
Selama ini kan pe suak skali kalu ada ba urusan ka Palu, karma depe jalan pe minta ampun jaoh skali, suak karma masih banyak jalan yang tabulengkar depe aspal, kon bikin abis doi karma ongkos makan saja pe banyak skali yang abis kalu mo ka Palu. Jadi so pasti om susupo yang memang asli orang Sultim, badukung skali ini Provinsi Sulawesi Timur lahir. Cuma biar badukung, karma om susupo juga babaliat,rupa so pebanyak skali rencana yang pernah dibikin buat mo perjuangkan ini provinsi, kon so pe banyak skali itu tamu dari Jakarta yang datang-datang, kon pe banyak juga ini sagala rupa janji, blum ditambah sagala rupa kalimat, pantun sampe tekad, kalu ini Sultim somo lahir dalam waktu dekat. Tapi yang om susupo liat, rupa te jelas-jelas ini provinsi mo lahir. Hele itu Provinsi Kalimantan Utara yang rupa blum lama dibacarita akannya orang Kalimantan Timur, eh so badiri jadi provinsi sandiri blum lama ini.
Baru bagimana deng ini Sultim, karna dulu saja, om susupo dengar so pebanyak skali doi daerah yang ada tapake buat babiayai sagala rupa…Cuma so itu, sampe skarang ini tatap kabur depe nasib.
Om susupo bukan juga mo patah smangat, bukan juga te mo baku parcaya. Cuma so itu, sarta badengar so ada lagi yang mulai ba urus, om susupo bapikir, yah jang sampe ini carita, depe jadi cuma mo baku pangge manghayal ulang lagi. Om susupo sebagai orang kacili memang te ada peranan selama ini, kacuali ba do’a supaya ini Sultim jadi. Cuma biar te ada peranan yang basaar, om susupo juga rupa tem au kalu cuma mo dipangge-pangge manghayal turuus, kon depe jadi te ada kejelasan.
Tagal itu, om susupo bapikir, kira-kira kalu memang masih suak mo jadi, lebeh bae yang dipikir skarang ini, supaya ini Kabupaten Banggai yang pe loas skali, di kase mekar dulu. Kan ada yang mo suka supaya Luwuk jadi Kota, kon ini Banggai bapindah depe ibukota. Baru ini orang di Tompotika sana juga suka mo jadi kabupaten sandiri, sama deng itu orang Tomini di bagian Bunta Pagimana sana yang juga mau bakase jadi kabupaten. Yah, memang depe proses panjang kon lama, tapi dari pada cuma mo baku pangge manghayal lagi, kan suak juga ini otak.
Karna om susupo rasa, ini sikapnya orang di Touna deng Morowali kan barangkali so te sama deng dulu. Dorang pe smangat mo ba urus Sultim, so te rupa dulu, apalagi soal ibukota provinsi juga bikin dorang pe otak jadi kalangkabut. Yah, kalu ini Kabupaten Banggai yang diurus supaya mekar, kan abis itu so boleh provinsi lagi yang diperjuangkan deng ibukota langsung di Luwuk, kon te parlu lagi bapangge kabupaten laen yang masih abu-abu depe sikap antara mau deng tidak…**