Oh, Musti Bapalang Dulu...

Om susupo sering bingung baliat ini pamarentah pe kabiasaan. Dorang pe argumen luar biasa kalu ada ba urus sesuatu kon depe jalur pake yang formal-formal. Tapi sarta rakyat so marah, kon ada yang so sampe ba tutup jalan, baru ini pamarentah kalangkabut kon akhirnya ba stujui ini rakyat pe usulan, kandati bastujui ditengah jalan. 

Macam ini soal pembentukan kecamatan Saluan. Om susupo so brapa taon lalu ada babadengar ini soal keinginannya rakyat di bagian nambo sana, supaya jadi kacamatan sandiri yang depe Saluan. Yah, pamarentah akhirnya so suruh sama itu kampus Untad supaya bikin akan depe kajian akademik, karna memang so musti bagitu depe syarat. Tapi sarta ada depe kajian akademik, eh depe garaap pamarentah so te ikot lagi. Ada pajabat yang bilang, ini pembentukan kecamatan yang depe Raperda so dikirim sama dewan, so dibikin akan depe kajian akademik. Tapi sarta om susupo liat-liat, te tau apa om susupo pe mata yang kana bilolo, atau ini pamarentah yang kalangkabut depe pikiran, yang jelas itu Raperda ada yang te sama deng isinya kajian akademik. Macam itu Luwuk Selatan, kan mustinya depe batas cuma sampe di Bubung, tapi di Raperda so dikase sampe di Nambo kon baku batas deng Kintom. Baru dimana depe sama deng kajian akademik. 

Kon sarta anggota dewan tanya waktu paripurna lalu, ada pajabat yang bilang kalu itu kecamatan Saluan blum bisa diajukan sama-sama deng yang laen. Cuma ini sikapnya pamarentah ternyata butul-butul kalangkabut. Eh sarta rakyat so marah, kon so sampe bapalang jalan, pamarentah akhirnya stuju deng itu pembentukan Kecamatan Saluan. Yang om susupo pusing akan, kanapa kon sampe musti baku palang jalan dulu, baru ini sikapnya pamarentah baku ikot stuju deng pikirannya rakyat. Om susupo jadi curiga, jang-jang ini pamarentah cuma mo baku uji nyali dulu deng rakyat. Barangkali, kalu rakyat te bamarah kon te bapalang jalan, itu kecamatan Saluan tatap te distujui mo dibahas capat-capat. Mustinya dari dulu pamarentah so tabuka depe pikiran, kalu ini rakyat di Nambo so tau, dorang pe aspirasi supaya kecamatan Saluan jadi badiri, memang so distujuinya Gubernur Sulteng, karna memang so ada depe kajian akademik. Kan kalu ini pamarentah bakarja butul-butul, te parlu rakyat pake cara batutup jalan yang akhirnya kasian bikin orang laen pe aktifitas taganggu. Cuma memang barangkali, rakyat musti bapake cara-cara bagitu dulu, baru ini pamarentah pe pikiran tabuka lebar skali... 

Mustinya, kajadian macam di Nambo itu jadi palajaran buat Pemda, supaya lebeh paduli deng rakyat pe keinginan. Rakyat juga te mo baminta yang aneh-aneh. Kan rakyat te baminta mo bakase badiri negara sandiri, jadi buat apa mo dipele-pele dorang pe keinginan itu. 

Kalu memang itu urusan pemekaran atau pembentukan kecamatan baru, bisa dikase gampang, te parlulah dikase susah. Jang sampe, kalu urusan kabutuhannya pajabat, macam mo babili oto dinas, macam mo perjalanan dinas, macam mo bakase bae depe kantor, macam mo tambah dorang pe fasilitas, dikase gampang skali depe urusan. Baru ini urusannya rakyat, yang cuma mo baminta yang maso-maso akal, kon rupa mo dikase repot butul. Mustinya, te parlu ini rakyat marah kon sampe mo bapalang jalan, pamarentah pasti so tau apa yang rakyat suka...dan yang pasti rakyat bukan baminta oto dinas...**