Minyak Memang Licin

Orang bilang, ba bisnis minyak memang banyak depe untung. Kandati banyak pakar perminyakan yang babilang, ba tambang minyak sama deng bajudi, karna babuang doi sampe jutaan dollar, blum tantu badapat hasil yang pulang pokok. Tapi kandati sama deng bajudi, tatap banyak yang bapikir mo baku ikot barmain minyak. Yah, kalu te dibisnis tambang, paling kurang baku ikot jadi tukang bawa minyak, macam babawa minyak tanah subsidi dari Luwuk ka daerah lain yang so mulai baganti deng gas elpiji. Depe resiko doi barangkali sadikit, dan so amper pasti bisa badapat untung banyak. Cuma so itu, karna barmain minyak, so pasti ada depe resiko. Karna babawa jatah minyaknya Luwuk ka kampung laen yang so mulai pake elpiji, akhirnya dihadangnya patugas, kon depe resiko, skarang so dipareksa pareksa. Kandati babantah, tapi barangkali karna polisi memang so dapat cium ada bau-bau minyak tanah, tatap dikase jadi tersangka. Beda kalu baunya minyak wangi, so pasti harum, kon te dilarang biar dibawa kamana-mana, kon mo dijual dimana saja.
Cuma om susupo liat, kalu barmain minyak BBM memang bikin tangan jadi licin. Macam itu panjual minyak tanah subsidi yang om susupo biasa haga, depe tangan memang so jadi licin, kon kalu mo kase bersih musti pake sabun, baru musti barapa kali diulang-ulang…Barangkali memang, karna barmain minyak itu licin, jadi itu orang yang so dapat tau babawa minyak tanah subsidi, tatap bakaraas, kalu dia te salah. Padahal dari yang om susupo dengar-dengar dari polisi, depe bukti so ada. Tapi masih juga babantah, deng babilang itu minyak orang punya, kon dia cuma baku bantu ba angkat akan, karna ada yang minta tolong di tengah jalan. Tapi sarta polisi pareksa, ebee ternyata depe dokumen pake namanya itu orang yang so jadi tersangka. Cuma so itu, karna memang so licin deng minyak, tatap bapake cara laen supaya jang capat diproses hukum. Yah, mulai ba alasan sakit, sampe bapake alasan ada baku ikot rapat. Maklum, itu yang barmain minyak memang pajabat, kon sebenarnya patugas hukum juga.
Om susupo pikir-pikir, skarang ini tinggal mo tunggu ini kabaraniannya polisi, mampu tidak mo baku urus deng orang yang barmain minyak. Memang , kandati depe kasus kacili, tapi te gampang mo ba urus itu masalah. Yah, karna memang minyak itu licin skali, jadi yang barmain minyak so pasti musti jago baku ikot akan. Karna kalu te baku ikot akan depe licin, bisa jadi capaat tapalisi. Om susupo cuma baharap, mudah-mudahan ini polisi yang memang patugas hukum, kon so dikase skolah ilmu hukum, te baku ikot tapalisi, kandati minyak itu bisa babikin banyak orang tapalisi…Karna kalu polisi so jadi tapalisi, baru sapa lagi yang mo diharapnya rakyat mo baku jaga akan deng ini minyak supaya te sambarang dibawa ka daerah lain yang depe harga so mahal kon susah mo didapat…Cuma om susupo masih yakin skali, polisi te mungkin tapalisi di kasus minyak tanah ini…**