Jang Abis Dicarita…

Ini carita soal pendidikan, dari dulu memang luar biasa. Apalagi kalu so politisi yang kuat babacarita akan, biasanya dorang pe janji gagah-gagah samua. Mulai dari mo bakase bae skolah-skolah, mo ba perhatikan guru, mo bakase bae depe kualitas, sampe mo bakase jadi gratis biaya skolah. Tapi sampe skarang ini, yang depe nama skolah gratis, memang baru sampe dicarita-carita yang gagah itu. Hele mo pigi baliat skolah saja, ada yang barangkali pamalas, kon kalu juga mo baliat skolah, biasanya yang dorang pigi liat yang gagah skali, rupa di skolah favorit. 

Kalu juga dorang pigi liat, paling biasa yang kaluar perasaan prihatin, kasian atau bakase liat muka sedih skali, macam yang blum makan tiga hari tiga malam. Tapi sarta so badapat kadudukan, ebee macam pe suak itu kaki mo balangkah ka skolah-skolah yang parlu perhatian itu. Te usahjo yang jaoh, yang dekat macam di SLB saja, ternyata ada pajabat yang ba urus pendidikan, yang blum pernah kaliatan di skolah itu. Baru bagimana mo bakase perhatian, atau paling kurang mo bakase liat muka sedih macam yang blum dikase makan, kalu hele mo papasiar ka skolah yang parlu perhatian, rupa pamalas mo dibikin. Bayangkan, dari carita yang om susupo dapat, itu skolah yang depe karja ba ajar anaka-anak yang depe otak kurang normal, depe pendengaran te jelas, depe mata kabur atau sagala rupa kakurangan, ternyata kurang dapat perhatian. Jang juga, mentang-mentang skolah yang depe isi murid yang banyak kakurangan, baru so jadi kakurangan perhatian juga, sampe kurang di pasian akan. 

Itu skolah katanya, ada ba ajar 50 anak yang sarba kakurangan. Tapi depe guru yang kebakanyakan honorer, ternyata juga kakurangan skali depe honor. Tiga bulan, buma badapat 200 ribu perak. Di zaman yang pe canggih kon mahal bagini, sapa juga yang bisa baku tahan hidup deng 200 ribu buat tiga bulan. Berarti satu bulan te sampe 70 ribu. Hele baraas satu karung so lebeh 300 ribu, baru honornya guru di skolah yang depe murid punuh kakurangan, cuma 200 ribu buat tiga bulan. Yah, akhirnya hele mo babawa anak-snak yang cacat mental deng fisik buat mo ba lomba di Palu, depe guru so kalangkabut, sampe so musti babajual telur asin ka kantor-kantor. Ini buat skolah yang depe murid kasian punuh deng kakurangan. Baru buat skolah yang depe murid ada normal, macam ada juga yang dikase biar bajalan babagitu saja. Macam yang di Lobu, ada skolah yang depe murid musti manyabrang kuala kon hanya nae rakit bambu. Mustinya, itu foto yang koran so kase liat bazaar-basaar, jang cuma mo dihaga fals. Coba kasian dari skarang pikir akan, supaya jang nanti so ada murid yang anyor di kuala Lobu, baru mo kalangkabut babikin program, mulai dari bakase turun tim sar, bakase turun tukang survey jambatan, sampe bakase turun program jambatan. Om susupo pikir, mustinya kan jang pake managemen tiba masa tiba akal, kalu memang ini pamarentah so mangaku canggih depe sagala rupa. Jang cuma depe doi perjalanan dinas yang dikase basaar turuus, baru doi buat rakyat pe kaparluan, cuma kede-kede…Pokoknya, om susupo baharap, ini soal bakase bae pendidikan, jang cuma abis dicarita turuus, kon akhirnya itu carita jadi kalaut…Kalu cuma bagitu, skalian jo deng tukang janji kalaut saja…nanti mo kirim tim sar buat bacari…**