Parlu Balajar...

Om susupo takaget juga waktu ad ataman yang bacarita soal kajadian di Bangkep, ada itu oknum patugas yang ba user wartawan, yang ada baliput di kantor DPRD, pas ada rapat dengar pendapat soal kasus honorer. Bukan cuma wartawan, aktifis LSM deng polisi juga ternyata dikase kaluar. Om susupo pikir, apa yang salah, kon sampe patugas so maen user bagini, macam itu kantor dorang pe rumah sandiri.
Mustinya, itu anggota dewan yang ada babikin rapat, bapake aturan kalu mo babikin rapat dengar pendapat itu jadi tatutup. Memang ada rapat yang otomatis tatutup, macam itu rapat internal pimpinan, rapat internal badan musyawarah atau rapat internal badan anggaran deng rapat internalnya badan kehormatan. Itu rapat dengar pendapat, juga bisa dibikin tatutup, kalu memang dianggap parlu, kon cuma bakase hadir pajabat tertentu. Tapi kalu yang babahas urusannya orang banyak, mustinya dikase tabuka buat umum.
Baru yang om susupo anggap garaap, ternyata yang basuruh patugas ba user, bukan wakil rakyat, tapi ada oknum tertentu yang katanya amper tiap hari ada papasiar di kantornya wakil rakyat itu.
Om susupo pikir, ini patugas juga parlu dikase balajar soal aturan, termasuk soal rapat-rapat di dewan, supaya jang sambarangan maen user. Soal balajar aturan, ini memang parlu skali, supaya jang sambarangan juga mo bakase liat body yang basaar. Karna dijaman yang so pe maju skali ini, bukan body basaar yang mo dikase baku tanding, tapi otak yang mo dikase baku liat. Kalu cuma mo baku andalkan body yang basaar, lebeh bae jadi atlet sumo supaya te salah-salah, kon bisa dikirim ka Japaang, sapa tau mampu baku lawan deng tukang sumo asli di negara yang hari-hari babekin oto deng motor itu
Tapi yah, karma so kajadian macam bagitu, om susupo memang cuma bapikir, barangkali memang ada yang te beres yang dibacarita akan, jadi ada yang takut kalu sampe wartawan tau. Kan memang banyak skali yang batutupi masalah, karna dorang takut, kalu wartawan so tau, kon sampe kaluar di barita, so bikin malu dorang pe nama bae deng dorang pe kaluarga. Biasa, dorang yang suka tatutup memang malu kalu apa yang dorang bikin, sampe orang tau, tapi yang bikin heran, biasa juga dorang ini te tau malu bakalakuan yang te bagus…Macam ini kasus honorer yang jadi masalah, kan barangkali memang ada yang te beres, apalagi sampe so ada yang jadi depe tersangka. Yah, om susupo harap, mudah-mudahan ini polisi bisa bakase tuntas itu kasus honorer yang depe kabar ada babau angus, supaya tabongkar-bongkar samua yang babikin jadi te beres. Apalagi dari yang orang carita, katanya ada orang penting yang juga tasangkot-sangkot deng itu kasus honorer. Kalu memang polisi serius, mustinya memang dibongkar saja samua, karma kasian ini honorer yang asli, kon sampe skarang blum jelas dorang pe nasib, baru ada yang mangaku so bakase-kase uang sama orang tertentu. Om susupo cuma baharap, mudah-mudahan itu patugas yang ba user-user wartawan, te ba alami nasib macam honorer yang ta akal, karna kalu sampe dorang ba alami nasib bagitu, trus terang om susupo mo bilang sama dorang “ngana rasa itu !!!” **