Pilkada So Abis Khan?

Ini kabiasaan bakomentar memang banyak yang om susupo liat sambarangan. Bayangkan, ada yang om susupo liat, ada yang karna dia te tau apa depe kapasitas, sampe akhirnya soditulis bakas tim sukses. Kon depe sambarangan, sampe soal Baperjakat so dikomen, soal BKD so dikomen, soal urusan PTUN juga so dikomen...Pokoknya ada yang om susupo biasa rasa gilii babaca ini ragam komennya orang. Barangkali karna talalu fans, pokoknya kandati bapake status bakaas tim sukses, yang penting musti bakomen, kandati biasa yang dikomen te baku sambung deng dorang pe ilmu. Macam itu soal PTUN dulu, ada yang bakomen kalu itu kesaksiannnya mantan pajabat te mo jadi pangaruh. Abis itu ada lagi komen soal Baperjakat, soal BKD sampe sagala rupa. Te cuma itu, sarta ada yang basuara ganas karna bakritik ini pamarentah, muncul lagi dorang pe komen yang basuruh supaya itu yang bakritik ganas dilapor ka polisi saja...

Om susupo sempat takets juga kalu babaca itu berita yang basuruh supaya yang bakritik ganas dilapor ka polisi, padahal yang dikritik rupa tenang-tenang saja, te bagoyang biar sadikit. Tapi te apalah, depe nama saja fans baraat, jadi te rela kalu depe idola sampe dihantam luar biasa. Cuma om susupo mo coba baingat, ini Pilkada kalu te salah kan so abis dari taon lalu eehh ?? 

Cuma kasian juga, biar so lama abis, tapi depe angin Pilkada macam blum abis sampe skarang ini. Bayangkan, masih banyak yang bapake atas nama tim sukses, kon sampe ada yang tatap batempel-tempel depe tulisan...Padahal, kalu om susupo te salah, ini yang dikritiknya masyarakat kan so pamarentah, jadi so bukan calon lagi.Yah, memang te apa-apa juga kalu masih mo baku bela abis-abisan. Depe nama saja fans baraat, jad so bagitu memang, musti baku bela turuus. Cuma so itu tadi, kira-kira kalu te baku cocok deng pengetahuan, kalu te baku kanaa deng ilmu, kalu te baku kait deng status, boleh dipikir-pikir ulang kasian sebelum bakomen. Bukan te boleh bakomen. Tapi skarang ini, yang mustinya baku bela deng ini kebijakannya pamarentah itu Bagian Humas, karna yang dikritik kan depe pamarentah, bukan lagi calon. 

Mustinya, kalu memang ada yang dianggap te beres deng ini kritikannya orang, kalu ada yang so dianggap te maso akal, kalu ada yang dianggap so talalo, yah mustinya itu Bagian Humas yang memang depe karja jadi juru bicaranya pamarentah yang bacarita deng lengkap. Rupa ini soal PTUN, lebeh bae kalu yang te mangarti hukum, kalu yang te jelas juga depe status di pamarentahan, babadiam akan kasian. Kase biar saja ini tim pembela yang memang dorang pe ilmu hukum lengkap yang babela abis-abisan. Kan jadi kalangkabut juga, kalu yang bakomen soal hukum tapi depe ilmu hukum juga kasian skali. Bakomen soal Baperjakat, tapi ternyata te bakuasai soal ilmu kepegawaian...

Om susupo rasa, ini pagawe yang ada bagugat, justru musti dikase penghargaan, karna kalu te puas deng kebijakan, jalan yang dorang pilih bukan pigi mangamuk babawa parang, tapi pigi ka jalur hukum. Kan ini Indonesia mo dibikin jadi negara hukum. Jadi mustinya, itu pagawe yang baproses hukum badapat hadiah, karna dorang ba ajar sama rakyat, kalu ada masalah, proses pake hukum, jang proses pake emosi kon babawa piso deng parang...Jang juga dorang yang mangarti hukum itu yang dibinci, sebab dorang so kase palajaran, kalu itu kebijakannya pajabat juga bisa digugat. Kacuali kebijakannya Tuhan, tantu te mungkin digugat kan ??**