Rakyat Salalu Kalah

Luar biasa ini rakyat pe pengorbanan. Waktu ada parlu di pemilihan umum anggota dewan, rakyat ini macam jadi barang yang diparlu skali, di cari-cari kandati ada sementara tidor, kon dipuja-puja, dikase janji-janji, supaya bapilih calon anggota dewan. Bagitu juga waktu somo pemilihan pimpinan, ini rakyat jadi macam raja, didatang akan, diliat-liat, diperhatikan, dikase hadiah, dikase makan, diurus bae-bae, kon di kase janji-janji enak juga. Tapi sarta samua so tapilih, ebee macam ini rakyat so dicuek-cuek. Yah, kalu masih ada yang kebetulan diliat-liat, biasa karna te talalo manuntut sama ini pamarentah. Yah, kalu yang duduk-duduk manis, kon skali-kali bapuji sama ini dorang yang so tapilih, memang masih diperhatikan. Yah, depe nama janji politiik, so bagitu memang depe kajadian. 

Cuma yang bikin ini hatinya om susupo macam mo tabakar, waktu tau ada pajabat yang bukan maen depe babela sama ini pengusaha, kon sama rakyat, macam te ada depe nilai. Bayangkan, ada pajabat yang luar biasa depe pikiran, sampe-sampe ini pengusaha yang baru tasopu, lebeh diperhatikan kon dibela-bela, daripada ini rakyat yang so tinggal bataon-taon, ada bakobon aman-aman, tapi akhirnya mandarita sarta depe kobon digusur-gusur buat kapantingannya itu pengusaha. Ini pajabat pamarentah, deng enteng babilang kalu itu yang rakyat bikin, te parlu diganti rugi, kandati so digusur-gusurnya pengusaha. Depe alasan kata, ini tanah yang buat areal penggunaan laen, memang buat pengusaha, kon itu pengusaha yang bisa baolah. Jadi kalu ada rakyat yang so ba olah duluan, kon sarta ada pengusaha yang mo suka maso, bisa langsung maso saja, te parlu diganti rugi itu rakyat pe usaha. So bagimana ini pajabat pe pikiran, kon babikin sambarangan kalimat yang bikin sakit rakyat. 

Padahal, kalu te salah ingat, mudah-mudahan om susupo pe pikiran blum heng, itu pajabat baru badapat kadudukan karna ini rakyat ada badukung bosnya itu pajabat supaya jadi pimpinan. Tapi sarta so kalangkabut ini soal tanah, deng enteng ini pajabat babilang te parlu ada ganti rugi, cukup kase kompensasi saja… 

Yang om susupo bingung, ini bosnya pajabat yang blum lama dipilihnya rakyat, ada tau atau tidak deng persoalannya rakyat. Jang karna so taduduk enak, so banikmati sagala rupa kahebatan karna rakyat pilih, baru abis itu rakyat so te dianggap lagi, kon depe anak buah sambarangan mo babikin penjelasan yang bikin sakit rakyat. Padahal yang om susupo dengar-dengar, pe banyak juga ini pengusaha yang pagaga skali, kon te jelas depe untung buat daerah. Sementara ini karugiannya daerah so pe banyak skali, mulai dari kampong so jadi kotor karna dampak karjanya pengusaha, ini gunung so rusak-rusak karna so karbasnya pengusaha, kon hasil buat daerah pe sadikit skali. Baru ini rakyat yang so takana dampak, bukan dibela, ee cuma ditambah kase sakit… 

Om susupo cuma mo kase ingat sama orang-orang yang badapat kadudukan karna rakyat pilih, tolong ingat kasian ini rakyat pe nasib. Ini rakyat cuma mo bacari hidup kon bapertahankan supaya tatap hidup, bukan mo karbas gunung, kon babajual depe tanah ka negara laen, baru untungnya daerah pe sadikit skali. Kalu rakyat so dikase sakit, lama-lama rakyat malawan. Cuma om susupo tasadar juga, kan banyak pajabat yang memang te pernah susah depe hidup, dari kacili, skolah, sampe dapat karja, memang so hebat dari dulu, kan maklum, anak bos juga…**