Kase Sejahtera Sapa ?

Om susupo sebenarnya salut deng ini pamarentah yang pe pang ide. Blum tabikin ini soal skolah gratis deng mo ba obat gratis, eh so muncul ide mo babikin perusahaan daerah yang baru, kon depe hebat mo dikase nama PT.Banggai Sejahtera. Bee, om susupo rupa mo menghayal baliat ini ide, apalagi so samua urusan mo dikarjanya itu perusahaan daerah yang baru mo direncana dibikin. Bayangkan, dari mo babajual, mo kontraktor, mo ba urus sawah, ba urus koboon, ba urus ikan, ba urus koran, ba urus televisi, ba urus bank, ba urus tambang, sampe ba urus oto deng pasawat, pokoknu itu perusahaan mo bikin. Om susupo yang cuma rakyat kacili ada menghayal, tantu ini rakyat kacili yang stengah mati badapat karja somo badapat karja kon so te tacatat jadi pengangguran di kantor Disnaker. Tapi sarta ada babacita deng orang laen, om susupo pe hayalan langsung tarbang te ada depe sisa. Itu tamaannya om susupo bilang, sadangkan perusahaan daerah yang cuma ba urus soal ba foto copy saja te sehat-sehat, no apalagi kalu so samua urusan mo dikarja. Hele perusahaan negara yang ini pamarentah pusat punya, cuma ba urus satu bidang saja supaya te kalangkabut, kon so bagimana depe jago, sampe ini perusahaan daerah mo bisa ba urus samua pakarjaan. Om susupo ingat-ingat, ini perusahaan negara memang rata-rata cuma mo ba urus satu dua usaha. Macam itu yang bakarja jalan, yah depe karja cuma urusan jalan deng jambatan, kon yang babangun bangunan, depe karja cuma urusan bangunan. Kalu mo ditambah, paling satu atau dua pakarjaan yang memang masih baku sambung. Tapi ini perusahaan daerah yang depe nama Banggai Sejahtera, bukan main depe urusan, so dari laut, darat, udara, dari pante sampe gunung, dari sawah sampe hutan, pokoknya samua mo dikarbas.

Om susupo pikir-pikir, so sapa ini di Luwuk yang pe jago skali, sampe bisa mo kase jalan usaha yang depe karja samua bidang. Om susupo bapikir, jang-jang ini Pemda mo basewa Tanri Abeng, itu manager yang depe tarif miliaran, buat mo bakase hidup ini perusahaan daerah. Tapi kalu baru depe sewa manager saja so miliaran, baru mo ambe darimana depe ongkos buat yang laen-laen, macam buat mo babikin kantor, babili depe meja deng kursi sampe babayar depe pagawe yang laen.

Baru kalu bukan Tanri Abeng yang mo disewa, kira-kira sapa yang ada di Luwuk ini yang depe karja luar biasa, sampe bisa mo bakase jalan perusahaan yang depe sibuk minta ampun, karna bakarja samua urusan.

Om susupo pikir-pikir, mustinya ini pamarentah juga jang sambarangan babikin konsep perusahaan daerah, kalu memang te bahitung-hitung depe sagala rupa, mulai dari depe modal sampe depe orang yang mo ba urus. Sudah kalu modal, masih bisa dicubit akan dari APBD, kon paling-paling buju sama itu anggota dewan supaya ditambah banyak-banyak buat perusahaan daerah. Tapi kalu tasalah pilih orang, kan bukan itu usaha yang jadi maju, tapi depe modal yang jadi kempes. Baru kalu so kalangkabut, itu tujuannya Banggai Sejahtera kira-kira bisa butul-butul mo sampe. Jang sampe, bukan daerah yang sejahtera, tapi cuma itu orang-orang yang ada tasinggah di perusahaan daerah yang badapat depe untung kon akhirnya jadi sejahtera sandiri. Yah, supaya butul-butul bagus, kan lebeh bagus kalu dibikin akan dulu depe kajian akademik di kampus yang hebat, sampe ada depe naskah akademik, supaya ditau, ini perusahaan memang so parlu buat daerah, atau cuma parlu buat orang tertentu...**