Sirkuit Dadakan…

Om susupo pada dasarnya suka deng samua kreatifitas, termasuk kreatifitas babikin lomba balap motor. Yah, daripada cuma baku kase liat jago di jalan, padahal bakase bahaya orang laen, kan lebeh bae kalu memang jago, ba ikot lomba kon babalap di kejuaraan. Kalu cuma mo baku-baku balap di jalan raya, so pasti bukan pujian yang didapat, tapi orang maki-makinya abis, sampe ada yang basumpah-sumpah akan supaya batabrak pot bunga yang ditrotoar…Jadi kalu memang jago babalap, ba ikot lombajo, kalu ada lomba-lomba yang modibikin lagi. Termasuk kalu yang suka-suka bakase standing motor waktu di jalan raya, lebe bae ba ikot itu grasstrack atau motocross. Tagal itu, om susupo salut skali deng ide kreatif macam babikin road race atau grasstrack. Ini lomba kan bisa jadi tampat ba uji nyalinya dorang-dorang yang bajingan di jalan. Kalu bajingan babawa motor, tapi takot ba ikot lomba, berarti buangjo itu nyali ka Teluk Lalong, kase makan bibisan.
Cuma, om susupo juga pusing babaliat ini korban akibat balap motor, yang rupa amper tiap ada lomba, ada turus depe korban. Om susupo liat, ini panitia memang so karja karaas, supaya ini panonton jang talalo badekat deng arena balap. Tapi so itu, karma memang ini sirkuit cuma dadakan dibikin, yah sarta samua so ka asyikan manonton, akhirnya so mulai barapat lagi sampe dipinggir jalan, kon bisa baku muka langsung deng motor yang sementara balari kancang parsis pelor. So pasti ini bahaya memang gampang skali muncul.
Om susupo pikir, laen kali memang so te bisa lagi ini jalan di komplek adipura mo dibikin buat lomba baku balap, kalu panitia deng patugas keamanan te mampu bajamin soal keamanannya panonton. Yah, biar lagi barangkali ada depe asuransinya buat panonton, tapi mo diapa itu asuransi kalu so tatabrak. Ini jalan balingkar Ahmad Yani deng jalan Sukarno, memang mustinya te bisa dibikin buat tampat babalap. Depe posisi, ini jalan ada di tengah kota, kon jadi jalan vital skali buat samua orang. Bayangkan, kalu jalan yang buat samua orang, baru cuma karma alasan mo babikin lomba, so ditutup buat umum, supaya yang maso musti babayar karcis. Padahal, itu yang dipake bukan sirkuit resmi, tapi jalan umum yang dibikin dari doinya rakyat, bukan doinya pengusaha tertentu. Baru yang lebeh penting lagi, karna memang bukan sirkut, jadi te ada tampat manonton yang jelas-jelas aman skali, macam depe tribun yang aman, depe wilayah aman buat motor deng pembalap (safety area), kon aman buat samua orang. Kalu sirkuit resmi, so pasti itu panonton te baku jejer kon baku rampas tampat sampe baku injak kaki, baru babadiri di pinggir jalan. Kalu sirkuit resmi, panonton ada baduduk indah di tribun, yang mo suka baliat turuus itu balapan silahkan, yang suka baku gombal sama-sama panonton juga silahkan, pokoknya aman. Tagal itu, om susupo mo kase saran, coba cari tampat laen yang cocok buat lomba, kalu masih mo babikin laen kali, kon bikin jadi sirkuit tatap yang bisa bajamin aman buat panonton. Kalu di sirkuit dadakan adipura, so pasti te aman buat panonton…**