So Adil…

Kalu om susupo te salah ingat, barapa waktu lalu ada yang babikin-bikin spanduk deng tulisan “jalan kami rusak.” Itu spanduk yang te ditau sapa yang bikin, sampe sempat bikin tatambah tegang situasi, maklum waktu itu kan lagi ada kegiatan politik. Pokoknya waktu itu, so muncul baku-baku Tanya, sapa yang ada babikin spanduk deng tulisan “jalan kami rusak”, kon ada tapasang di banyak tampat.
Om susupo pikir, memang te ada depe salah deng itu spanduk, karna memang banyak jalan yang rusak, sampe bikin suak kalu balewat akan itu jalan.
Barapa waktu lalu, ini orang Lamala sampe Balantak, biasa mengeluh soal dorang pe jalan rusak, kon bikin rusak oto deng motor yang balewat. Kalu depe orang te usah ditanya, so pasti sakit-sakit balakang nae di motor deng oto yang ada balewat akan jalan rusak, apalagi kalu motor so peku-peku kon depe shockbreaker so mati, so pasti suak skali, parsis baru abis tajungkir-jungkir…
Cuma ada om susupo pe taman yang politisi ada babilang, so ini skarang yang depe nama so adil. Kalu dulu dia bilang, yang biasa mengeluh soal jalan kaburek, paling lebeh banyak orang dari kapala burung atau dari Pagimana Bunta kamari. Tapi skarang, sampe orang dari Toili juga so mengeluh. Ini kan depe nama so adil, karna so samua jurusan depe jalan rusak, bagitu dia bilang.
Ini barangkali depe nama pemerataan. Jadi so te pas, kalu masih ada yang mengeluh depe jalan rusak, kon ba anggap ini pamarentah diskriminatif alias pilih kasih. Karna skarang ini kan, so amper samua jurusan, depe jalan rusak, babalobang, kon depe aspal takupas-kupas. Jadi so samua orang bisa barasa itu jalan yang kaburek. Tagal itu, ini berarti so adil skali. Orang yang di jurusan Masama, Lamala sampe Balantak, orang yang di Pagimaa, Bunta atau ka Bualemo, orang yang ka Batui deng Toili, juga so sama-sama barasa jalan yang punuh deng lobang kon depe aspal so tabongkar-bongkar.
Om susupo jadi bapikir, barangkali itu orang yang pernah babikin spanduk deng tulisan “jalan kami rusak” so boleh babikin lagi spanduk deng depe tulisan yang sama, kon musti lebeh banyak, baru pasang disamua jurusan. Kalu parlu, depe tulisan tambah kamari, jadi so babunyi “jalan kami so tatambah rusak.”**