BUAT RAKYAT ATAU...?

 

Kalu so te ditunda, om susupo dengar ini hari mo ada paripurna perubahan di alat kelengkapannya dewan. Om susupo dengar kabar, tadi malam pe banyak skali yang ada baku-baku lobi, mulai dari soal mo baku bujuk supaya itu anggota dewan yang depe kursi te cukup tiga kon cuma batempel di fraksi laen,  bapindah ka fraksi laen. Yah, kalu ada yang bapindah fraksi, so pasti ada fraksi so jadi kempes karna depe anggota so takurang, tapi ada fraksi yang so jadi gode skali.

Om susupo bisa babayangkan, biasanya kalu ini yang so gode skali, tantu depe makan juga jadi so banyak. Ini fraksi yang so gode skali, tantu depe mau juga so jadi banyak skali, kon om susupo dengar, ada yang memang mo pasang rencana deng target buat mo bakuasai samua bagian.

Dari yang om susupo dengar, ini soal mo bapindah fraksi tantu te ada depe salah juga. Barangkali memang ada yang cuma sekedar mo bacari taman satu fraksi yang bikin enak hati, bikin nyaman ini bapikir, kon barangkali supaya bisa lebeh kreatif. Cuma barangkali juga, ada yang memang baku atur mo pindah fraksi ini, depe tujuan bukan soal te enak hati, tapi karna memang te puas, jadi bacari sesuatu yang laen, sapa tau badapat sesuatu yang lebeh basaar.

Depe ujung-ujung, kalu so ada fraksi yang pe basaar skali, tantu so bapikir buat mo bakuasai itu samua alat kelengkapan. Bagus juga barangkali, kalu depe tujuan supaya ini program buat rakyat yang mo diusul, bisa deng gampang jadi lolos, karna satu fraksi so banyak orang, kon so pasti gampang badapat dukungan. Tapi, om susupo ada badengar carita te sadaap juga. Ada yang mangaku, selama bagabung deng yang babasaar, dorang juga te talalo difungsikan, kon akhirnya te banyak dikase bagian. Cuma om susupo blum mangarti, bagian apa yang dorang ada maksud itu.

Om susupo yang cuma orang orang luar, kon cuma bisa manonton, tantu cuma baharap, mudah-mudahan dari samua yang dorang ada baku atur akan itu, tatap bisa ba pikir akan buat rakyat. Jang sampe, cuma mo baku-baku lobi, cuma mo baku-baku atur, kon depe ujung supaya badapat tampat sadaap, tapi giliran buat rakyat, dorang tatap ada babadiam akan. Kan pe banyak juga ini wakil rakyat, yang sampe somo maso tiga taon, macam blum kaliatan butul depe peran jadi wakilnya rakyat itu. Sebab hele bacarita di forum resmi, masih banyak yang om susupo liat macam masih gugup skali, kon depe tangan masih babagoyang parsis orang yang kana malaria. Kalu baru mo bacarita saja, so gugup kon babagoyang macam malaria, baru bagimana mo baku karaas ba bela rakyat pe kapantingan. Jang sampe juga, dari samua yang dorang ada atur-atur ulang, mulai dari itu fraksi yang so barubah, komisi deng alat kelengkapan dewan laen yang so dirombak ulang, baru ternyata te dipake buat ba urus rakyat pe kabutuhan. Jang sampe mamang, ini niat mo bakuasai samua alat kelengkapan dewan, cuma buat mo dipake baatur-atur kabutuhannya anggota dewan itu sandiri atau cuma buat kapantingannya parpol itu sandiri. Om susupo sandiri so cukup suak baliat ini sandiwara di gedung dewan di Jakarta yang ada dikase liatnya televisi. Jang sampe, ini anggota dewan di Luwuk juga cuma mo basandiwara lagi, baru rakyat cuma mo banonton sagala rupa yang dorang bikin, kon te jelas apa yang dorang perjuangkan buat rakyat...Kalu sampe bagini, jang harap rakyat sosusah mo parcaya sama itu anggota dewan...**

EBEE, JANG BIKIN MALU

Om susupo liat-liat, ini pamarentah luar biasa juga, karna somo barencana mo babikin itu BUMD baru yang depe nama PT Banggai Sejahtera. Barangkali memang ini pamarentah somo serius mo bakase sejahtera ini samua orang di Kabupaten Banggai, karna kalu cuma mo lewat pembangunan yang biasa-biasa saja, cuma pake programnya pamarentah yang lewat dinas, ini rakyat susah mo sejahtera. Tagal itu barangkali, parlu ada lagi BUMD yang depe tugas mo bakase sejahtera ini rakyatnya Kabupaten Banggai. Apalagi dari yang om susupo dengar-dengar, ini usaha yang ada mo dibikinnya itu BUMD baru, pe banyak skali. Mulai dari bagale-gale tanah, ba urus ikan, ba urus pesawat, ba urus koran, ba urus hotel, ba urus proyek, ba urus sawah, ba urus bank deng sagala rupa urusan, samua mo diurus. 
Cuma yang om susupo ada dengar-dengar, ada kabar kalu ini BUMD baru rupa mo diurusnya pansiunan pajabat lagi, macam itu usaha-usahanya daerah yang laen kon sampe skarang te jelas depe pakarjaan yang bikin untung daerah. 
Yah, om susupo sebagai orang yang te mangarti deng urusan bisnis, cuma bisa babadengar orang pe komen. Memang ada yang stuju, kandati om susupo te mangarti kanapa kon dorang itu maen stuju. Tapi kalu dari yang blum stuju, om susupo dengar, dorang bukan te stuju, tapi dorang bilang, macam masih parlu di pikir-pikir ulang, supaya jang cuma bagaya babikin-bikin ide soal usaha baru, padahal depe hasil sama deng nol basaar. Om susupo juga do liat-liat sandiri, ada itu BUMD yang so taon-taon dikase badiri, eh sampe skarang ini te jelas depe storan sama daerah, hele depe kantor saja ada bakugepe deng kantor kalurahan. Sadangkan itu BUMD yang so ada kantor gagah saja, sampe skarang ini depe storan ebee cuma kacili skali...Mo ba urus usaha yang cuma satu bidang saja, macam minta ampun depe kalangkabut, apalagi kalu so samua urusan mo di urusnya BUMD, so pasti tatambah kalangkabut. Om susupo sandiri batanya-tanya, so sapa ini orang di Kabupaten Banggai yang so pe jago skali, kon sampe bisa mo ba urus ini BUMD yang depe urusan samua usaha. Jang sampe kasian, itu orang pe rambut sampe rontok kon jadi botak depe kapala, karna disuruh bakase bajalan BUMD yang depe modal alakadarnya, tapi dikase samua urusan. 
Yah, itu om susupo pe taman yang  anggota dewan ada babilang, jang sampe cuma mo jadi nafsu yang pe basaar skali, tapi akhirnya loyo alias lemah syahwat. Kan kasian juga, kalu cuma mo bikin usaha daerah, tapi cuma karna banafsu tinggi, padahal depe modal kacili, baru depe orang yang batangani juga cuma modal pengalaman karna pernah jadi pajabat. Sarta disuruh babikin sagala rupa pakarjaan yang depe hasil musti bastor doi sama pamarentah, eh depe jadi kalangkabut.
Dari pada kasian cuma mo macam orang yang nafsu tinggi tapi tenaga kurang, kon akhirnya lemah syahwat, lebeh bae dipikir ulang bae-bae, supaya jang bikin malu. Buat apa juga mo babikin ide badan usaha barunya daerah, tapi depe konsep juga blum jelas, bisa mo kase untung daerah atau tidak. Atau jang sampe juga, daerah te pernah untung, tapi ini orang-orang tertentu yang batarima depe untung karna so dibikin akan usaha, kon pake atas nama daerah...Jang sampe, bukan Banggai yang sejahtera, tapi cuma itu orang-orang tertentu yang jadi hebat...Jadi, coba dipikir-pikir ulang kasian...**

Korban BBM...

Om susupo pe jantung jadi kalangkabut juga babaliat itu siaran televisi tadi malam, yang ada bakase liat aksi mahasiswa sampe malam, kon polisi so pake sagala rupa cara buat mo bakase bubar mahasiswa yang ba demo ba tolak itu harganya bahan minyak dikase nae. Sampe-sampe so ada yang kana tembak kon babaluka, baru ada juga yang takana pukulan. Om susupo pikir, ini polisi deng mahasiswa macam so baku anggap musuh barangkali, kon so sampe baku hantam, rupa so te baku anggap kalu sama-sama rakyat yang tinggal di Indonesia kon parlu baku jaga. 
Cuma yang om susupo pusing akan skali, ini pamarentah pe sikap macam te baku pusing deng ini kajadian dilapangan. Te tau ini pajabat pamarentah ada manonton tv atau barangkali cuma ada bakaraoke, sampe macam te baku pusing deng sagala rupa kajadian antara mahasiswa deng polisi. Kasian juga baliat ini polisi, yang musti disuru baku hadap deng sagala rupa aksinya mahasiswa turus, padahal bukan polisi yang mo bakase nae harganya BBM. Polisi kan manusia juga, kalu so suak tantu so nae emosi juga. Tapi so itu tadi, ini pamarentah tatap babadiam, kon depe pajabat penting cuma mo baku tahan deng rencana mo bakase nae harganya BBM.
Om susupo masih basukur juga, karna kajadian yang di kota-kota basaar macam Jakarta deng Makassar itu, sampe skarang ini te taliat di Luwuk. Ini mahasiswa deng polisi masih bisa baku jaga dorang pe sikap masing-masing.
Cuma kalu soal korban BBM, kalu di kota-kota basaar itu so ada yang sampe ta tembak atau bangka-bangka karna kana pukul, di Luwuk sebenarnya juga so ada yang jadi korban. Cuma memang depe korban bukan karna bademo kon bukan karna kana tembak atau bangka-bangka kana pukul. Yang di Luwuk ini, kan so banyak rakyat yang somulai susah mo badapat bensin, karna ini antrian di pompa bensin minta ampun tiap hari. Om susupo sandiri jadi bosan mo baku antri buat mo dapat bensin yang depe harga masih normal, karna kalu mo ba antri buat ba isi bensin di motor yang depe tengki cuma ta isi tiga liter lebeh, so musti abis waktu bajam-jam. Daripada mo baku antri, om susupo terpaksa ba isi bensin di tukang jual eceran yang depe harga so sampe 7000 satu botol. Apa yang om susupo rasa ini, so dirasanya banyak orang juga, jadi so banyak yang jadi korban harga BBM yang so minta ampun depe mahal. Kon sarta om susupo babajalan di pasar, ternyata bukan cuma bensin yang so pe mahal skali. Ini minyak tanah so lebeh kalangkabut lagi. Kalu di pangkalan yang cuma dua kali satu minggu masih bisa badapat deng harga 3000 satu liter, di pasar ternyata so paling murah 5000 satu liter. Ada yang so lebeh mahal dari itu.
Om susupo pikir, ini korban BBM ternyata so pe banyak skali, karna ini rakyat terpaksa babili bensin deng minyak tanah yang so pe mahal skali. So kacau bagini depe harga, eh masih ada juga patugas Pol PP yang pake oto dinas mo coba bajual minyak tanah ka kampung sablah. Untung so dapat tau waktu itu, jadi batal babawa minyak tanah ka kampungnya orang. Cuma om susupo blum tau, itu patugas yang mo bajual minyak tanahnya rakyat Banggai ka kampung laen, so dikase maso di kamar sel atau blum. Kalu blum, berarti dia itu blum jadi korban BBM macam om susupo deng orang-orang kacili yang laen ini...**